U Biełarusi pabudujuć jašče 10 śmiećciesartavalnych kompleksaŭ

Jak paviedamiŭ načalnik upraŭleńnia kamunalnaj haspadarki i enierhietyki Ministerstva žyllova-kamunalnaj haspadarki Alaksiej Fiłanovič, kompleksy płanujecca ŭźvieści ŭ bujnych rajonnych centrach z nasielnictvam bolš za 80 tysiač čałaviek u nastupnuju piacihodku, piša ahienctva «Minsk-Naviny».

Ciapier u krainie ŭžo pracujuć 10 zavodaŭ pa sartavańni śmiećcia — u Minsku, abłasnych centrach i bujnych haradach, takich jak Babrujsk, Baranavičy, Navapołack i Orša. U rajonach stvorana 81 linija ručnoha sartavańnia dla papiery, kardonu, škła, PET-butelek, polietylenu i mietału.

U apošniuju piacihodku raspracoŭka mahutnaściaŭ išła praz stvareńnie rehijanalnych abjektaŭ, jakija abjadnoŭvajuć niekalki rajonaŭ. Naprykład:

• Brescki rehijon achoplivaje Brescki, Žabinkaŭski, Małarycki i Kamianiecki rajony;
• Baranavicki rehijon — Baranavicki, Hancavicki i Lachavicki rajony;
• Orša — Aršanski, Dubrovienski i Tałačynski rajony.

U 2025 hodzie ŭviedzieny ŭ ekspłuatacyju rehijanalny abjekt dla Babrujskaj zony i dla Minska (Minski śmiećciepierapracoŭčy zavod). Na finalnaj stadyi budaŭnictva znachodziacca abjekty ŭ Homieli, Navapołacku i Vaŭkavyskim rajonie.

Ministerstva taksama padkreślivaje, što madernizacyja sistemy zboru i vyvazu śmiećcia budzie rabicca praz pašyreńnie raździelnaha zboru adkidaŭ, uklučajučy sielskija nasielenyja punkty i pryvatny siektar. Asablivaja ŭvaha nadajecca zboru niebiaśpiečnych adkidaŭ — rtutnych lampaŭ, elektroniki, batarejek i praterminavanych lekaŭ.

Za dzieviać miesiacaŭ biahučaha hoda było sabrana kala 691 tysiačy ton takich adkidaŭ, što składaje 71,3% ad hadavoha płana. Najbolš — u Minsku i Homielskaj vobłaści.

Kamientary da artykuła