«Ja hetaha nie daruju». U palitviaźnia, vyviezienaha ŭ Litvu, znajšli hiepatyt S — napeŭna, zarazili za kratami
50‑hadovy Vital Bandaruk atrymaŭ piać hadoŭ źniavoleńnia za palityku i vyjšaŭ na volu 11 vieraśnia 2025-ha, kali jaho ŭ składzie hrupy palitviaźniaŭ vyvieźli ŭ Vilniu. Padčas miedahladu ŭ Litvie mužčynie paviedamili — ź biełaruskaj niavoli jon pryvioz niaprostuju chvarobu.
Vital Bandaruk. Fota: gazetaby.com
Pavodle słoŭ Bandaruka, za kratami jaho zarazili hiepatytam S. U mužčyny jość surjoznaja padstava ličyć, što heta adbyłosia mienavita padčas źniavoleńnia, bo niezadoŭha da aryštu jon prachodziŭ miedkamisiju, kab pierazdać na paśviedčańnie kiroŭcy.
I chacia ŭ Biełarusi padčas takich miedkamisij redka praviarajuć na hiepatyt S, imavierna, Vitala sapraŭdy zarazili hetaj chvarobaj za kratami. Hiepatyt S pieradajecca navat pry minimalnaj kolkaści kryvi, tamu, kab spynić chvarobu, važna dobra sterylizavać miedyčnyja instrumienty i vykarystoŭvać adnarazovyja šprycy.
Vital padazraje, što ŭ jaho vypadku hetaje praviła mahli parušyć. Taki sposab pieradačy — adzin z asnoŭnych dla hiepatytu S:
«Kali vychodziš z ŠIZA ŭ škłoŭskaj kałonii, ty zaŭsiody chvory — u ciabie razdźmutyja sustavy na kaleniach, pryščy pa ŭsim ciele, jany mocna śviarbiać, inšyja balački vyskokvajuć. Dyk ja ŭ takim vypadku źviartaŭsia da [turemnych] miedykaŭ, jany mnie stavili roznyja kropielnicy i ŭkoły.
Ja nie zaŭsiody moh za hetym prasačyć. Časam ja bačyŭ, što dastajuć z upakoŭki adnarazovy špryc, a časam i nie bačyŭ. Byvaŭ u takim drennym stanie, što ŭsio roŭna na šprycy, tolki b choć niešta kałoli. Jašče mianie tam pryščapili ad kavidu».
Mahčyma, kaža Vital, jaho zarazili jašče da kałonii, ale ŭžo paśla aryštu. U bresckim SIZA mužčyna pierachvareŭ na pnieŭmaniju i taksama atrymlivaŭ ukoły.
Jašče, razvažaje mužčyna, jon moh atrymać virus na turemnym režymie — Vital znachodziŭsia ŭ mahiloŭskaj turmie sa studzienia 2024‑ha hoda. Tam viaźni mieli asabistyja stanki dla haleńnia, ale zachoŭvalisia jany ŭ adnoj sumcy ź jačejkami dla kožnaha stanka. Časam, kaža Bandaruk, stanki kłali nie ŭ tuju jačejku. Atrymlivajecca, što luby viazień tearetyčna moh pahalicca stankom čužoha čałavieka, u tym liku i chvoraha na hiepatyt S.
Siońnia hetaja chvaroba dobra lečycca, hałoŭnaje — svoječasova daviedacca pra zaražeńnie.
Vital aburany tym, što ciapier vymušany mieć spravu z hiepatytam S:
«Ja što, pavinien hetamu režymu niešta daravać? Ja nie chaču jamu ničoha daravać. Ja pajšoŭ tudy narmalnym čałaviekam, a vyjšaŭ chvory».