Dyk što za abjekt lacić praz Soniečnuju, jaki nahadvaje kiravany kaśmičny karabiel? Navukoŭcy dali kančatkovy adkaz

NASA apublikavała zdymki.

Kamieta 3I/ATLAS, źniataja aparatam Mars Reconnaissance Orbiter 2 kastryčnika. Fota: NASA / JPL-Caltech / University of Arizona

Nacyjanalnaje ŭpraŭleńnie pa aeranaŭtycy i daśledavańni kaśmičnaj prastory (NASA) apublikavała vyjavy mižzornaha abjekta 3I/ATLAS. Publikacyja była adkładziena z-za 43‑dzionnaha prypynieńnia pracy ŭrada ZŠA, što vyklikała pavyšanuju hramadskuju cikavaść i sparadziła śpiekulacyi pra mahčymaje štučnaje pachodžańnie abjekta.

Jak paviedamlaje The New York Times, na pres-kanfierencyi pradstaŭniki ahienctva abvierhli hetyja zdahadki, paćvierdziŭšy, što abjekt źjaŭlajecca kamietaj.

«Chaču adrazu raźviejać čutki. Hety abjekt — kamieta. Jon vyhladaje i pavodzić siabie jak kamieta», — zajaviŭ pradstaŭnik NASA Amit Kšatryja. Navukoŭcy padkreślili, što nie było vyjaŭlena nijakich «technasihnatur» — prykmiet, jakija b pakazvali na technałahičnaje pachodžańnie.

Danyja byli sabranyja niekalkimi kaśmičnymi aparatami, uklučajučy Mars Reconnaissance Orbiter i misiju Lucy, jakaja ciapier na šlachu da Jupitera. Heta dazvoliła atrymać vyjavy z roznych rakursaŭ i stvaryć bolš poŭnaje ŭjaŭleńnie pra abjekt.

Kamieta 3I/ATLAS, zafiksavanaja misijaj ESA/NASA SOHO 15—16 kastryčnika (źleva) i źniataja aparatam Lucy 16 vieraśnia. Fota: Lowell Observatory / Qicheng Zhang; NASA / Goddard / SwRI / JHU-APL

3I/ATLAS — treci viadomy abjekt, jaki trapiŭ da nas z-za miežaŭ Soniečnaj sistemy. Kamieta pralacieła kala Marsa ŭ kastryčniku, paśpieŭšy dać mahčymaść šmatlikim aparatam zirnuć na jaje zblizku.

Daśledavańni pakazali, što kamieta maje inšyja suadnosiny vuhlakisłaha hazu i vady, a taksama praporcyi nikielu i žaleza. Ad jaje pyłavoha vobłaka taksama «nietypovym» čynam adbivajecca śviatło, što śviedčyć pra inšy pamier jaho čaścic.

Navukoŭcy paraŭnali hetyja adroźnieńni z roźnicaj pamiž hatunkami kavy: «jana inšaja, ale ŭsio adno zastajecca kavaj».

Vyjava kamiety 3I/ATLAS, stvoranaja šlacham abjadnańnia zdymkaŭ STEREO-A, zroblenych 11—25 vieraśnia (źleva), i zafiksavanaja z arbity Marsa aparatam MAVEN 9 kastryčnika. Fota: NASA / Lowell Observatory / Qicheng Zhang; NASA / Goddard / LASP / CU Boulder

Vyjava z vysokim razroźnieńniem, zroblenaja z arbity Marsa, choć i atrymałasia krychu zmazanaj z-za techničnych asablivaściaŭ kamiery, vyrazna demanstruje kamietnuju pryrodu abjekta — najaŭnaść jarkaha centra i hazava-pyłavoha vobłaka.

Kamieta 3I/ATLAS ruchajecca z chutkaściu bolš za 240 000 km/h, što paćviardžaje jaje mižzornaje pachodžańnie. Jana ŭžo pakidaje miežy Soniečnaj sistemy. Nazirańni za abjektam praciahnucca, u pryvatnaści, z dapamohaj kaśmičnaha aparata Juno, kali kamieta budzie pralatać kala Jupitera.

Kamientary da artykuła