Vyzvalili palitźniavolenuju maci čatyroch dziaciej. Jaje mužu prysudzili 24 hady kałonii

U studzieni 2024 hoda ŭ Drahičynskim rajonie za dapamohu Ukrainie KDB zatrymaŭ adrazu 12 čałaviek. Niekatorych brali siemjami. Siarod ich byli sužency Jaŭhien i Lidzija Hruk. 22 listapada Biełaruś viarnuła Ukrainie 31 ukrainca, u tym liku i 30‑hadovuju Lidziju, asudžanuju za «ahienturnuju dziejnaść». 

Lidzija Hruk paśla vyzvaleńnia. Fota: Ivan Ancipienka / Suśpilnie

U prapahandysckim filmie biełaruskaha dziaržaŭnaha kanała ANT śćviardžałasia, što Lidzija z mužam Jaŭhienam fatahrafavała pamiežnyja abjekty. Siamiejnaj pary, u jakoj čaćviora niepaŭnaletnich dziaciej, vystavili abvinavačańnie ŭ «teraryźmie».

U kamientary «Suśpilnomu» žančyna paśla viartańnia va Ukrainu paviedamiła, što abvinavačańnie ŭ «teraryźmie» paźniej pierakvalifikavali ŭ «ahienturnuju dziejnaść». Pa hetym abvinavačańni joj prysudzili 4 hady źniavoleńnia.

Jaŭhien i Lidzija Hruk. Skryn videa ANT

Jana taksama zajaviła, što jaje muž dapamahaŭ ukraincam.

«Nijakich dziejańniaŭ ja nie rabiła (havorka idzie pra abvinavačańnie ŭ «teraryźmie» — Red.). Ja viedała, što moj muž dapamahaje ŭkraincam, što jon kantaktuje ź imi. Ja viedała, što jon na baku Ukrainy», — skazała Lidzija žurnalistam paśla vyzvaleńnia.

Jana dadała, što jaje mužu prysudzili 24 hady kałonii ŭzmocnienaha režymu. Dzieci (dva syny i dźvie dački) ciapier znachodziacca ŭ śviakruchi ŭ Biełarusi.

Samaj małodšaj dačce padčas jaje zatrymańnia było ŭsiaho 7 miesiacaŭ. Ukrainka choča zabrać dziaciej da siabie i spadziajecca na dapamohu z boku maci muža.

Kamientary da artykuła