Łukašenka: Pieradajcie Madura, što my jaho zaŭsiody ŭ Biełarusi čakajem
Alaksandr Łukašenka čakaje vizitu prezidenta Vieniesueły ŭ Biełaruś. Pra heta jon zajaviŭ na sustrečy z pasłom Vieniesueły ŭ RF Rafaelem Sałasaram Viełaskiesam.
Fota: Pedro Mattey/Anadolu via Getty Images
«Spadar pasoł, Vieniesueła — nie čužaja dla Biełarusi kraina. Daŭno, vielmi daŭno z vami supracoŭničajem. Chaciełasia b, kab našy adnosiny byli bolš intensiŭnymi, prasunutymi. Jość pra što pahavaryć. Vielmi prašu vas pieradać majemu siabru Nikałasu Madura, što my jaho zaŭsiody ŭ Biełarusi čakajem. Para ŭžo jamu pabyvać tut, u Biełarusi. Ja pierakanany ŭ tym, što ŭ jaho takoje ž staŭleńnie da mianie. Ja budu ŭsialak imknucca da taho, kab znajści čas i naviedać Vieniesuełu. Časy prablemnyja, składanyja, ciažkija, ale, tym nie mienš, ź lubych stanoviščaŭ situacyi možna znajści vychad. Treba tolki imknucca da hetaha. Vy heta nie horš za mianie razumiejecie», — skazaŭ Łukašenka.
Apošnim časam nad Nikałasam Madura zhuścilisia chmary. ZŠA naraścili hrupoŭku la bierahoŭ Vieniesueły dla baraćby z narkakartelami. Na dumku Vašynhtona, vialikaja kolkaść narkotykaŭ u Złučanyja Štaty pastupaje ź Vieniesueły.
Taksama Donald Tramp uchvaliŭ padrychtoŭku sakretnych dziejańniaŭ CRU ŭnutry Vieniesueły, jakija mohuć pryvieści da maštabnaj vajskovaj kampanii.
CRU atrymała sankcyju na praviadzieńnie apieracyj, što ŭklučajuć dyviersii, kibier- i psichałahičnaje ŭździejańnie z metaj «padrychtavać pole boju». Vajskoŭcy ž paralelna prapracoŭvajuć varyjanty dakładnych udaraŭ pa abjektach, źviazanych z narkatrafikam, i pa achovie Madura. Siarod pracoŭnych scenaroŭ — zachop naftavych radoviščaŭ Vieniesueły, a taksama zachop abo likvidacyja Madura.
Pry hetym Tramp adnačasova inicyjavaŭ zakrytyja pieramovy z Madura. Pavodle słoŭ surazmoŭcaŭ haziety, vieniesuelski lidar paviedamiŭ, što hatovy pajści ŭ adstaŭku paśla dvuch—trochhadovaha pierachodnaha pieryjadu. Bieły dom admoviŭsia razhladać takuju adterminoŭku, ale dypłamatyčny šlach vychadu ź situacyi całkam nie vyklučany.
Čytajcie taksama:
Supraćstajańnie ZŠA i Vieniesueły: avijanosnaja hrupa amierykanskaha VMF prybyła ŭ Karybskaje mora
Madura prapanavaŭ pajści ŭ adstaŭku ciaham dvuch-troch hadoŭ. Bieły dom patrabuje syści nieadkładna
U administracyi Trampa abmiarkoŭvajuć płan pa likvidacyi prezidenta Vieniesueły
U Vieniesuele pryniaty płan abarony na vypadak uvarvańnia ZŠA