Supraćstajańnie ZŠA i Vieniesueły: avijanosnaja hrupa amierykanskaha VMF prybyła ŭ Karybskaje mora
Avianosnaja hrupa ZŠA na čale z novym i najbujniejšym avianoscam u śviecie «Džerald Ford» prybyła ŭ Karybskaje mora. Pra heta abviaściła kamandavańnie amierykanskaha fłotu. Donald Tramp, jaki addaŭ zahad ab pieradysłakacyi hrupy, kaža, što robić heta ŭ miežach baraćby z narkatrafikam ź Vieniesueły, piša Bi-bi-si.
Pra zahad Trampa Pientahon abviaściŭ 24 kastryčnika. U toj čas avijanosnaja hrupa znachodziłasia la jeŭrapiejskich bierahoŭ, u Paŭnočnym mory.
Fłot i avijacyja ZŠA ŭžo niekalki miesiacaŭ nanosiać udary pa małych sudnach u Karybskim mory i Cichim akijanie, jakija, jak śćviardžaje kiraŭnictva ZŠA, pieravoziać narkotyki. Jany nanieśli ŭžo nie mienš za 19 takich udaraŭ, u vyniku jakich byli zabityja jak minimum 76 čałaviek.
Vieniesuelski lidar, levy sacyjalist Nikałas Madura i inšyja pradstaŭniki kiraŭnictva krainy abvinavačvajuć ZŠA ŭ tym, što jany štučna stvarajuć kryzis z metaj adchileńnia ich ad ułady.
Amierykanski fłot zajaviŭ, što 11 listapada avijanosnaja hrupa ŭvajšła ŭ zonu adkaznaści Paŭdniovaha kamandavańnia ZŠA, jakaja ŭklučaje Karybskaje mora i krainy Łacinskaj Amieryki.
Na «Džeraldzie Fordzie» bazirujucca niekalki dziasiatkaŭ bajavych samalotaŭ. Jaho ekipaž razam ź lotčykami i lotnym techničnym piersanałam składaje bolš za 4,5 tysiačy čałaviek. Avijanosiec supravadžajuć rakietnyja eśmincy i inšyja bajavyja i dapamožnyja karabli.
Jak zajaviŭ pres-sakratar Pientahona Šon Parneł, prybyćcio avijanosnaj hrupy ŭ Karybskaje mora dazvolić ZŠA bolš efiektyŭna adsočvać i spyniać narkatrafik.
Da hetaha ŭłady ZŠA ŭžo adpravili ŭ rajon Vieniesueły značnuju vajennuju siłu: 10 źniščalnikaŭ F-35 byli dysłakavanyja ŭ susiedniaj Puerta-Ryka, akramia taho, u rehijonie ŭžo znachodziacca atamnaja padvodnaja łodka i vosiem vajennych karabloŭ: try eskadranyja minanoscy, krejsier, karabiel bierahavoj achovy i try desantnyja karabli.
Razam z avijanosnaj hrupaj, jakaja prybyła, jany składuć hrupoŭku, jakuju ZŠA nie źbirali la bierahoŭ Łacinskaj Amieryki ŭžo dziasiatki hadoŭ.
Udary nanosiacca i ź inšaha boku kantynienta: u pačatku hetaha tydnia ZŠA abviaścili ab dvuch novych udarach pa mierkavanych sudnach narkahandlaroŭ u Cichim akijanie i hibieli šaści čałaviek.
Hetyja ŭdary pa katarach i barkasach pryviali da rostu napružanaści ŭ adnosinach ZŠA nie tolki ź Vieniesuełaj, ale i z susiedniaj Kałumbijaj. Akramia taho, mnohija ŭ rehijonie i pa-za im abvinavačvajuć ZŠA ŭ tym, što jany hetymi ŭdarami parušajuć pravy čałavieka i mižnarodnaje prava.
U pačatku listapada, adkazvajučy ŭ intervju amierykanskaha partniora Bi-bi-si, telekampanii CBS, na pytańnie ab abvinavačvańniach u padrychtoŭcy ŭdaraŭ pa Vieniesuele, Donald Tramp adkazaŭ: «Ja nie schilny kazać, što ja b heta zrabiŭ. Ja nie źbirajusia kazać vam, što ja źbirajusia zrabić ź Vieniesuełaj, niezaležna ad taho źbirajusia ja heta zrabić ci nie».
U tym ža intervju CBS Tramp paŭtaryŭ svajo śćviardžeńnie, što «kožnaje z hetych źniščanych sudnaŭ zabivaje narkotykami 25 tysiač čałaviek i źniščaje siemji pa ŭsioj našaj krainie».
Kamientary