Što viadoma pra vobšuki ŭ kiraŭnika Ofisa prezidenta Ukrainy Andreja Jermaka?

Nacyjanalnaje antykarupcyjnaje biuro Ukrainy pravodzić śledčyja dziejańni ŭ kiraŭnika Ofisa prezidenta Andreja Jermaka. Vobšuki ŭ siabie doma paćvierdziŭ i sam Jarmak i zajaviŭ pra poŭnaje sadziejničańnie śledčym.

Fota: lyas Tayfun Salc/Anadolu via Getty Images

«Nacyjanalnaje antykarupcyjnaje biuro Ukrainy (NABU) i Śpiecyjalizavanaja antykarupcycjnaja prakuratura (SAP) ažyćciaŭlajuć śledčyja dziejańni (vobšuki) u kiraŭnika Ofisa prezidenta Ukrainy. Śledčyja dziejańni sankcyjanavanyja i ažyćciaŭlajucca ŭ miežach rasśledavańnia. Padrabiaznaści — paźniej», — havorycca ŭ paviedamleńni.

Vobšuki ŭ siabie doma paćvierdziŭ i sam Jarmak i zajaviŭ pra poŭnaje sadziejničańnie śledčym, piša Bi-bi-si — Ukraina.

«Siońnia NABU i SAP sapraŭdy pravodziać pracesualnyja dziejańni ŭ mianie doma. Nijakich pieraškod u śledčych niama. Im byŭ dadzieny poŭny dostup u kvateru, na miescy — maje advakaty, jakija ŭzajemadziejničajuć z pravaachoŭnikami», — napisaŭ jon u telehram.

U jakoj spravie adbyvajucca vobšuki i jaki status u Jermaka, pakul nieviadoma. U NABU situacyju pakul što nie kamientavali.

Niadaŭna apazicyja i častka deputataŭ ad praprezidenckaj partyi «Słuha naroda» patrabavali adstaŭki Andreja Jermaka z pasady kiraŭnika OP. Heta adbyłosia ŭ vyniku karupcyjnaha skandału ŭ enierhietycy, tak zvanaha «Mindzičhiejta».

Zvolnić Jermaka prezident Zialenski, jak vyhladaje, pakul nie maje namieru.

U pačatku listapada NABU i SAP pravodzili vobšuki jašče ŭ adnaho blizkaha siabra prezidenta — biźniesoŭca Cimura Mindziča. Jon vyjechaŭ za miažu za niekalki hadzin da źjaŭleńnia pravaachoŭnych orhanaŭ. Usio heta vyliłasia ŭ hučny karupcyjny skandał. Padazravanyja, siarod jakich Mindzič i saŭdzielniki, nibyta źbirali adkaty z pastaŭščykoŭ «Enierhaatama».

Pavodle danych detektyvaŭ, havorka idzie pra sotniu miljonaŭ dalaraŭ.

Deputat Jarasłaŭ Žalaźniak kazaŭ, što na zapisach NABU Jarmak fihuruje jak «Ali-Baba». Adnak hetaja infarmacyja nie maje aficyjnaha paćviardžeńnia.

Raniej kiraŭnik Śpiecyjalizavanaj antykarupcyjnaj prakuratury Alaksandr Klimienka zajaŭlaŭ, što «Ali-Baba» jość na plonkach. Pavodle jaho słoŭ, «Ali-Baba» razdaje zadańni, kab pieraśledavać detektyvaŭ NABU.

Tak zvany «Mindzičhiejt» zapuściŭ va Ukrainie paŭnamaštabny palityčny kryzis. Ministraŭ justycyi Hiermana Hałuščanku i enierhietyki Śviatłanu Hrynčuk adpravili ŭ adstaŭku. Ich imiony fihurujuć na zapisach NABU.

U NABU kažuć, što rasśledavańnie praciahvajecca i jašče treba vyśvietlić, kamu i jak pieradavalisia karupcyjnyja hrošy. Zusim niadaŭna Andrej Jarmak pravodziŭ mirnyja pieramovy ad imia Ukrainy z pradstaŭnikami ZŠA ŭ Ženievie.

Napiaredadni vyjšła jaho intervju va ŭpłyvovym The Atlantic, u jakim jon zajaviŭ, što Ukraina nie admovicca ad svaich terytoryj dziela miru.

Chto taki Andrej Jarmak

U 2025 hodzie vydańnie Politico, cytujučy krynicy, nazyvała Jermaka «žorstkim palityčnym lalkavodam» i čałaviekam, jaki moža «na roŭnych» razmaŭlać z prezidentam Zialenskim.

Jaho žartaŭliva nazyvali vice-prezidentam, chacia va Ukrainie niama takoj pasady. Padčas praŭleńnia Zialenskaha Jarmak staŭ klučavoj fihuraj va ŭkrainskaj uładzie.

51‑hadovy Jarmak, jak i sam Zialenski, byŭ pačatkoŭcam u palitycy. Jon maje adukacyju ŭ halinie mižnarodnaha prava, pracavaŭ u śfiery jurysprudencyi i kinavytvorčaści.

Da 2019 hoda jon bolš za 20 hadoŭ zajmaŭsia pieravažna jurydyčnaj praktykaj. Klijentami zasnavanaj im kampanii byli najbujniejšyja televizijnyja kanały i mižnarodnyja kinakampanii, naprykład, Disney, Pixar abo Universal. Niezadoŭha da pachodu ŭ palityku Jarmak navat sam spradziusavaŭ niekalki filmaŭ. Dziejnaść u hetaj śfiery surjozna paŭpłyvała na jaho dalejšy los. Tak jon paznajomiŭsia z mnohimi zorkami Halivuda — i skarystajecca hetymi znajomstvami ŭ budučyni.

A kali klijentam Jermaka byŭ adzin z najbujniejšych ukrainskich telekanałaŭ «Inter», jon paznajomiŭsia ź jaho hienieralnym pradziusaram. Hienpradziusaram tady byŭ Uładzimir Zialenski.

Paźniej Zialenski raspaviadzie: spačatku, pavodle jaho zadumy, Jarmak pavinien byŭ zaniać pasadu vice-premjera pa pytańniach akupavanych terytoryj i vieści pieramovy ab abmienie pałonnych z Rasijaj. Adnak paźniej vyrašyli, što ŭradavaja pasada budzie abmiažoŭvać Jermaka ŭ kantaktach — tak jon atrymaŭ pasadu pamočnika prezidenta. Adrazu paśla pieramohi na prezidenckich vybarach jon rychtavaŭ Zialenskamu mižnarodnyja pajezdki, sustrečy z zamiežnymi lidarami i ŭziaŭ na siabie pieramovy ŭ «narmandskim farmacie».

Taksama Jermaku ŭdałosia ŭstalavać ciesnyja kantakty z kamandaj tahačasnaha prezidenta ZŠA Donalda Trampa. Praŭda, paźniej hetyja adnosiny vyklikali skandał, vynikam jakoha staŭ pačatak pracedury impičmientu amierykanskaha prezidenta — usio praź nibyta jaho cisk na Zialenskaha. Kiraŭnik OP «hasiŭ» situacyju ŭnutry Ukrainy, pastajanna padkreślivajučy, što na prezidenta niemahčyma cisnuć, a amierykancy niachaj raźbirajucca sami — heta ich unutranaja historyja.

Taksama jon staŭ hałoŭnym pieramoŭnikam Zialenskaha z Rasijaj, vycieśniŭšy z hetaha pola Viktara Miedviedčuka. Jarmak pravodziŭ rehularnyja sustrečy i telefonnyja razmovy z namieśnikam kiraŭnika administracyi prezidenta RF Dźmitryjem Kazakom. Ź pieršaha dnia vialikaj vajny ŭpłyŭ Jermaka imkliva ros i akramia źniešniaj palityki raspaŭsiudžvaŭsia jašče i na ŭnutranuju.

Viadomy vajenny žurnalist Juryj Butusaŭ ličyć, što mienavita Jarmak stajaŭ za adchileńniem kiraŭnika SBU i hienieralnaha prakurora 17 lipienia 2022 hoda.

«Jarmak zvolniŭ Bakanava i Vieniadziktavu i zabiaśpiečyŭ kantrol nad usioj pravaachoŭnaj sistemaj. Zialenski davieryŭ Jermaku ŭsiu ŭładu i svajo pieravybrańnie», — skazaŭ Butusaŭ uletku 2022 hoda.

«U nas niama poŭnaściu dziejsnaha Kabinieta ministraŭ. Zamiest hetaha my majem niejki kvazi-ŭrad, uznačaleny Jermakom, jaki kantraluje dostup da prezidenckaha paradku dnia i samoha prezidenta», — havaryła Darja Kalaniuk, vykanaŭčaja dyrektarka Centra supraćdziejańnia karupcyi.

Ciažka znajści jakuju-niebudź pratakolnuju fatahrafiju prezidenta Zialenskaha, na jakoj pobač ź im nie było b hetaha vysokaha sutułaha mužčyny. Praz roźnicu ŭ roście časam zdajecca, što jon prosta navisaje nad Zialenskim.

Financial Times pisała, što Zialenski i Jarmak zblizilisia padčas poŭnamaštabnaha ŭvarvańnia — jany pravodziać razam čas paśla pracy, mohuć hulać u tenis abo hladzieć filmy. Jany trenirujucca razam u spartzale.

Andrej Jarmak poŭnaściu pryśviačaje siabie pracy. Jon nie maje dziaciej i nie žanaty, tamu moža pastajanna znachodzicca pobač z prezidentam pry nieabchodnaści, pisała vydańnie. Andrej Jarmak byŭ pobač z Uładzimiram Zialenskim padčas najvažniejšych padziej — ad vizitu Džo Bajdena ŭ Kijeŭ da pajezdak Zialenskaha ŭ Vašynhton i ŭ inšyja važnyja mižnarodnyja kamandziroŭki.

Kamientary da artykuła