Častka Biełharada zastałasia bieź śviatła paśla taho, jak na horad upała rasijskaja bomba
Uviečary 6 śniežnia ŭ Biełharadzie na Staražavoj vulicy adbyŭsia vybuch na elektrapadstancyi. U vyniku častka horada i pryharady zastalisia biez elektraenierhii, piša The Moscow Times.
Pavodle najaŭnych paviedamleńniaŭ, heta adbyłosia z-za niaštatnaha schodu avijabomby z rasijskaha bajavoha samalota. Adzin čałaviek atrymaŭ traŭmu, jaho dastavili ŭ miascovuju balnicu z papiarednim dyjahnazam «baratraŭma».
Žychary rajona pierad vybucham čuli huł samalota, jaki lacieŭ u bok miažy. Miesca padziej było aharodžana, pracuje avaryjnaja słužba. Akramia traŭmavanaha čałavieka, paškodžany hruzavik i vybityja vokny ŭ dvuch pryvatnych damach. U niekatorych rajonach horada časova nie pracavała elektrazabieśpiačeńnie i častkova spynilisia śviatłafory.
Pa padlikach telehram-kanała Astra, z pačatku hoda rasijskija samaloty ŭžo kidali minimum 133 avijabomby na kantralavanuju Rasijaj terytoryju pablizu miažy, u tym liku na terytoryju Biełharada, a taksama try rakiety. Za minuły hod na hetyja terytoryi ŭpała jak minimum 165 avijabombaŭ.