Amierykanski startap prapanuje zareziervavać za miljon miesca ŭ hateli na Miesiacy

Kalifarnijski startap abviaściŭ pra pačatak pryjomu braniravańniaŭ na numary ŭ budučym hateli na Miesiacy. Kampanija prapanuje zamožnym amataram pryhod zareziervavać miesca, uniesšy depazit u pamiery 1 miljona dalaraŭ. Adkryćcio hatela płanujecca na 2032 hod, piša Space.com.

Mastackaja vyjava budučaha hatela na Miesiacy. Fota: GRU

Kampanija Galactic Resource Utilization Space (GRU), zasnavanaja vypusknikom Kalifarnijskaha ŭniviersiteta ŭ Bierkli Skajleram Čanam, 12 studzienia zapuściła sajt dla braniravańnia i pradstaviła kancepcyju budučaha miesiačnaha hatela. Pavodle zajavaŭ raspracoŭščykaŭ, jon pavinien stać pieršaj u historyi pastajannaj pabudovaj pa-za miežami Ziamli.

Dla budaŭnictva płanujecca vykarystoŭvać śpiecyjalnyja žyllovyja moduli i aŭtamatyzavanuju technałohiju pierapracoŭki miesiacavaha hruntu ŭ tryvałyja budaŭničyja materyjały. Pačatak rabot pryznačany na 2029 hod, ale tolki paśla atrymańnia ŭsich dazvołaŭ.

Pieršyja klijenty hatela — heta, jak miarkujecca, udzielniki kamiercyjnych kaśmičnych palotaŭ i bahatyja pary, jakija šukajuć niezvyčajnaje miesca dla miadovaha miesiaca. U GRU ličać, što mienavita turyzm stanie klučom da raźvićcia ekanomiki Miesiaca i dapamoža čałaviectvu chutčej vyjści za miežy adnoj płaniety.

Zasnavalnik kampanii adznačaje, što čałaviectva ciapier znachodzicca ŭ pierałomnym momancie, kali źjaŭlajecca realny šaniec stać mižpłanietnym vidam jašče pry žyćci sučasnaha pakaleńnia. Na jaho dumku, u budučyni miljardy ludziej zmohuć naradžacca i žyć na Miesiacy i Marsie.

Skajleru Čanu 21 hod, jon inžynier u halinie elektratechniki i kampjutarnych navuk. Ideja hatela na Miesiacy źjaviłasia ŭ jaho padčas udziełu ŭ startap-aksieleratary Y Combinator. Pa jaho słovach, prajekt užo atrymaŭ finansavuju padtrymku ad inviestaraŭ, źviazanych z SpaceX i kampanijaj Anduril.

Stvareńnie pastajannaj bazy na Miesiacy taksama ŭvachodzić u płany ZŠA pa pašyreńni prysutnaści ŭ kosmasie, jakija padtrymlivaje kiraŭnictva NASA i prezident Donald Tramp. Čan spadziajecca, što jaho kampanija zmoža stać častkaj hetaj stratehii. Akramia taho, GRU apublikavała analityčny dakumient, u jakim apisvajecca doŭhaterminovaja vizija zasialeńnia Miesiaca — pačynajučy z elitnaha hatela i zakančvajučy paŭnavartasnaj kałonijaj.

Kamientary da artykuła