Rasija vypadkova vyvieła sa stroju adzinuju startavuju placoŭku dla piłatavanych palotaŭ
Niadaŭni zapusk karabla «Sajuz», jaki dastaviŭ troch kasmanaŭtaŭ da Mižnarodnaj kaśmičnaj stancyi, nanios značnuju škodu adzinaj rasijskaj startavaj placoŭcy, zdolnaj adpraŭlać kasmanaŭtaŭ na arbitu.
Incydent adbyŭsia 27 listapada padčas startu kaśmičnaha karabla «Sajuz MS-28» ź placoŭki № 31/6 kasmadroma Bajkanur u Kazachstanie. Rakieta paśpiachova vyvieła na arbitu ekipaž, u skład jakoha ŭvajšli rasijskija kasmanaŭty Siarhiej Kudź-Śviarčkoŭ i Siarhiej Mikajeŭ, a taksama astranaŭt NASA Krys Uiljams. Usie troje paśpiachova dabralisia da MKS, dzie, jak płanujecca, prabuduć vosiem miesiacaŭ.
Što zdaryłasia
Adnak, jak piša Ars Technica, nieŭzabavie paśla startu rasijskaje kaśmičnaje ahienctva «Raskosmas» paviedamiła, što padčas tradycyjnaha ahladu paśla zapusku byli vyjaŭlenyja paškodžańni niekalkich elemientaŭ startavaha kompleksu. Aficyjnyja asoby nie ŭdakładnili charaktar pałomak, adznačyŭšy tolki, što škoda aceńvajecca i budzie vypraŭlenaja ŭ najbližejšy čas.
Pavodle infarmacyi vydańnia, situacyja moža być bolš surjoznaj, čym paviedamlajecca aficyjna. Vidavočca incydentu śćviardžaje, što padčas startu ŭ hazaadvodny kanał (tak zvanuju «vohniennuju kanavu» pad rakietaj) zvaliłasia vielizarnaja płatforma absłuhoŭvańnia.
Hetaja kanstrukcyja vahoj kala 20 ton, jakaja vykarystoŭvajecca piersanałam dla dostupu da rakiety pierad startam, vidavočna, nie była naležnym čynam zamacavanaja. Mahutnaja ciaha ruchavikoŭ prosta zdźmuła jaje ŭniz.
Test na tryvałaść va ŭmovach vajny
Hetaje zdareńnie maje značnyja nastupstvy dla rasijskaj kasmanaŭtyki. Placoŭka № 31/6 na hety momant źjaŭlajecca ŭ Rasii adzinaj, jakaja technična hatovaja da zapuskaŭ piłatavanych karabloŭ «Sajuz» i hruzavikoŭ «Prahres». Histaryčnaja placoŭka № 1 («Haharynski start») niadaŭna była vyviedzienaja z ekspłuatacyi i pieratvarajecca ŭ muziej. Choć u Rasii i isnujuć dva dziejnyja kasmadromy — «Uschodni» i «Plasieck», nivodzin ź ich nielha apieratyŭna pieraabstalavać pad patreby prahramy MKS.
«Faktyčna z hetaha dnia Rasija straciła mahčymaść zapuskać ludziej u kosmas, čaho nie zdarałasia z 1961 hoda», — cytuje CNN rasijskaha kaśmičnaha žurnalista Vitala Jahorava.
Jak piša Ars Technica, hetaje zdareńnie stała svojeasablivym testam dla kiraŭnictva rasijskaj kaśmičnaj haliny va ŭmovach vajny va Ukrainie, jakaja pahłynaje značnyja resursy krainy. Zachodnija ekśpierty adznačajuć, što raniej Rasija płanavała padtrymlivać pracu stancyi da 2030 hoda pry minimalnych układańniach, navat skaraciŭšy kolkaść piłatavanych misij z čatyroch kožnyja dva hady da troch, kab aščadzić hrošy.
Ciapier ža Maskvie pryjdziecca terminova šukać srodki i mahčymaści dla składanaha ramontu, što prademanstruje realnuju stupień ich zacikaŭlenaści ŭ mižnarodnym partniorstvie.
Ryzyki dla MKS
Asablivuju zakłapočanaść u NASA vyklikaje mahčymaje spynieńnie palotaŭ hruzavych karabloŭ «Prahres». Hetyja aparaty krytyčna važnyja nie tolki dla dastaŭki hruzaŭ i karekcyi vyšyni arbity MKS. Jany taksama źjaŭlajucca klučavym elemientam sistemy aryjentacyi stancyi: mienavita ciaha ruchavikoŭ «Prahresaŭ» vykarystoŭvajecca dla taho, kab «razhružać» amierykanskija siłavyja hiraskopy, zdymajučy ź ich nazapašany lišak vuhłavoha momantu.
Choć amierykanskija karabli Dragon i Cygnus tearetyčna mohuć uziać na siabie častku hetych funkcyj, poŭnaja zamiena rasijskich hruzavikoŭ u doŭhaterminovaj pierśpiektyvie zastajecca pad pytańniem.
Na hety momant nieviadoma, kolki času zojmie ramont paškodžanaha kompleksu. Zhodna z infarmacyjaj Space News, užo mienš čym praz try tydni, 20 śniežnia, z paškodžanaj placoŭki pavinien adbycca zapusk bieśpiłotnaha hruzavoha karabla «Prahres». Nastupnaja ž piłatavanaja misija zapłanavanaja na lipień 2026 hoda.
Jak adznačajuć ekśpierty, časovaja strata adzinaj rasijskaj startavaj placoŭki niepaźbiežna pavialičvaje nahruzku na kampaniju SpaceX. Va ŭmovach, kali karabiel Starliner ad Boeing usio jašče maje patrebu ŭ vyprabavańniach, rakieta Falcon 9 zastajecca adzinym nadziejnym srodkam dastaŭki jak ludziej, tak i hruzaŭ na stancyju.
Ciapier kampanii Iłana Maska, mahčyma, daviadziecca nie tolki vykonvać svaje kantrakty, ale i strachavać rasijski siehmient prahramy MKS, pakul Bajkanur budzie likvidavać nastupstvy avaryi.
Kamientary
Ale miž inšym amierykancy i jeŭrapiejcy vyrašyli prablemu,a ciapier ruśnie samoj prydziecca vykarystoŭvać batut. ))