U Minsku zrabili vystavu da jubileju Jasienina i paklikali na adkryćcio Biazrukava

Vystava, pryśviečanaja 130‑hadovamu jubileju rasijskaha paeta Siarhieja Jasienina, adkryłasia ŭ Nacyjanalnym mastackim muziei Biełarusi ŭ Minsku. U ekspazicyi pradstaŭlena bolš za 100 tvoraŭ žyvapisu, hrafiki i skulptury sučasnych rasijskich mastakoŭ na temu žyćcia i tvorčaści Jasienina, piša BiełTA.

Siarhiej Biazrukaŭ na adkryćci vystavy. Fota: BiełTA

Asnoŭnaja častka tvoraŭ na vystavu pastupiła z mastackaha fondu muzieja Jasienina ŭ Voroniežy, jaki papaŭniajecca dziakujučy rehularnym «Jasieninskim pleneram», što pravodziacca z 2012 hoda ŭ rodnym siele paeta Kanstancinava ŭ Razanskaj vobłaści. 

Fota: BiełTA

Rasijski akcior Siarhiej Biazrukaŭ, jaki ŭ svoj čas syhraŭ hałoŭnuju rolu ŭ mastackim filmie pra Jasienina i byŭ zaprošany na adkryćcio vystavy ŭ Minsku, adznačyŭ, što častka «jasieninskaj dušy» ciapier prysutničaje ŭ stalicy Biełarusi i paraiŭ naviedać ekspazicyju dla natchnieńnia.

Fota: BiełTA

Artyst padkreśliŭ, što jon rady vialikaj kolkaści prychilnikaŭ Jasienina ŭ Minsku i adznačyŭ, što «dva narody abjadnoŭvaje luboŭ da radzimy i hłybinnaje viedańnie rodnaj movy».

U listapadzie minułaha hoda Siarhiej Biazrukaŭ z-za svajoj lubovi da Jasienina i nie nadta vialikaj pavahi da admietnaści inšych narodaŭ trapiŭ u skandalnuju situacyju va Uźbiekistanie. 

U intervju artyst sam raskazvaŭ historyju, jak padčas znachodžańnia ŭ Taškiencie jamu padaryli kvietki i jon vyrašyŭ nočču ŭskłaści ich na mahiłu Taćciany Jasieninaj — dački paeta, jakaja padčas Druhoj suśvietnaj vajny apynułasia va Uźbiekistanie i pražyła tam paŭstahodździa da svajoj śmierci. Biazrukaŭ adznačyŭ, što na mohiłkach miascovyja rabotniki dapamahali jamu znajści darohu da mahiły, choć havaryli pa-rusku ź ciažkaściu. Paśla jon staŭ, pierakazvajučy, paradziravać akcent, čym vyklikaŭ abureńnie va ŭźbiekaŭ. 

Kamientary da artykuła