Tramp paprasiŭ Pucina na tydzień spynić abstreły ŭkrainskich haradoŭ

Prezident ZŠA Donald Tramp zajaviŭ, što paprasiŭ Uładzimira Pucina na praciahu tydnia spynić abstreły ŭkrainskich haradoŭ, i toj pahadziŭsia. Ab hetym jon skazaŭ padčas sustrečy ŭ Biełym domie.

Donald Tramp. Fota: Getty Images. Chip Somodevilla/Getty Images

Tramp rastłumačyŭ svaju prośbu ekstremalnymi marazami: u nastupnym tydni ŭ Kijevie prahnazujuć da -25°C.

«Ja asabista paprasiŭ prezidenta Pucina nie abstrelvać Kijeŭ i inšyja harady ciaham tydnia praz mocnuju chvalu choładu va Ukrainie. Jon pahadziŭsia. I, pavinien vam skazać, heta było vielmi pryjemna», — skazaŭ Tramp žurnalistam.

Ci paabiacaŭ jon Rasii niešta ŭzamien, Tramp nie skazaŭ.

Raniej rasijskija vajenkary paviedamlali, što vyšejšaje kamandavańnie RF nibyta addało zahad ab zabaronie ŭdaraŭ pa enierhietyčnaj infrastruktury Ukrainy i lubych abjektach u Kijevie i vobłaści. Maratoryj nibyta dziejničaje da 3 lutaha i źviazany z čarhovym raŭndam pieramoŭ u Abu-Dabi 1 lutaha.

U hety čas u Kijevie i inšych haradach Ukrainy praciahvajucca masavyja adklučeńni elektraenierhii praz rasijskija abstreły. Enierhasistema krainy znachodzicca ŭ samym ciažkim stanie za apošnija hady. Najciažejšaja situacyja ŭ Kijevie, Kijeŭskaj i Dnieprapiatroŭskaj abłaściach: u Kijevie biez aciapleńnia zastajucca 700 damoŭ, u Kryvym Rohu — 234. Dla adnaŭleńnia ciepłazabieśpiačeńnia ŭ Kijevie zadziejničana bolš za 1000 kamunalnych rabotnikaŭ.

Kamientary da artykuła