WSJ apisała try scenary raźvićcia padziej va Ukrainie ŭ 2026 hodzie

Adnak narastajučaje napružańnie sioleta moža pasłabić pazicyi Kijeva ci Maskvy, vymusiŭšy ich pajści na ździełku, da jakoj jany pakul nie hatovy. Asnoŭnyja tezisy WSJ pierakazvaje «Ahienctva».

Scenar 1. Praciah vajny. Kreml pa-raniejšamu ŭpeŭnieny, što ŭkrainskaja armija złamajecca raniej, čym ekanomika Rasii, adnak Ukraina jašče dalokaja ad krachu, havorycca ŭ publikacyi.

Pry hetym abodva baki bajacca hnievu Trampa z-za tupikovaj situacyi ŭ pieramovach. Ukraina pa-raniejšamu maje patrebu ŭ raźvieddanych i inšaj padtrymcy z boku ZŠA, a Rasija ŭraźlivaja da bolš žorstkich sankcyj. Tamu kožny bok imkniecca pakazać, što pavodzić siabie kanstruktyŭna, a vinavaty ŭ praciahu vajny praciŭnik.

Dla ŭkrainskaha hramadstva i kiraŭnictva pieradača niezachoplenych terytoryj Rasii zastajecca adnoj z «čyrvonych linij». «Ideja addać Danbas rasijanam vyhladaje tak, što jany atrymajuć biaspłatna terytoryju, na zachop jakoj u advarotnym vypadku, vierahodna, vydatkavali b jašče paŭmiljona čałaviek», — skazaŭ były ministr abarony Ukrainy Andrej Zaharadniuk.

Uładzimir Zialenski supraciŭlajecca cisku z metaj pieradačy Danbasa i zajaŭlaje, što lubaja ździełka pa terytoryi zaležyć ad harantyj biaśpieki, jakija ŭklučali b jeŭrapiejskija vajennyja bazy va Ukrainie i, što asabliva važna, padtrymku z boku ZŠA.

Va ŭkrainskim hramadstvie zachoŭvajecca «vialiki skieptycyzm» nakont pieramovaŭ pad kiraŭnictvam ZŠA, kaža Zaharadniuk. Pavodle jaho słoŭ, heta tłumačycca tym, što kožnaja vajennaja, pramysłovaja i palityčnaja padzieja ŭ Rasii sihnalizuje pra jaje namier praciahvać vajavać.

Scenar 2. Ukraina zdajecca pieršaj. Najbolšaj ryzykaj dla Kijeva WSJ nazvała źniasileńnie USU. Addanyja sałdaty zmahajucca biez adpačynku šmat hadoŭ, a navabrancy, jakija nie adčuvajuć entuzijazmu, usio čaściej deziertujuć, havorycca ŭ publikacyi. USU kampiensujuć niedachop piachoty pastajannym udaskanaleńniem svaich mahčymaściaŭ u halinie bieśpiłotnikaŭ, ale Rasija niadaŭna dahnała Ukrainu ŭ vykarystańni dronaŭ, piša WSJ.

Vajennyja ekśpierty nie čakajuć, što sioleta situacyja na poli boju źmienicca. Praktyčna bieśpierapynny nastup Rasii ŭ Danbasie z kanca 2023 hoda staŭ adnym z samych pavolnych i darahich u vajennaj historyi. Nieba, zapoŭnienaje bieśpiłotnikami, zrabiła bujnamaštabnyja manieŭry praktyčna niemahčymymi.

Kali Ukraina vyčarpaje svaje siły, joj, mahčyma, pryjdziecca pajści na pahadnieńnie, jakoje budzie ciažka pryniać, ale jakoje budzie lepšym, čym alternatyŭny varyjant, havorycca ŭ publikacyi. Heta moža paciahnuć zadavalnieńnie patrabavańniaŭ Maskvy ŭ dačynieńni da terytoryi, abmiežavańnia vajennaj mocy Ukrainy i adnaŭleńnia ŭpłyvu Rasii na žyćcio ŭ krainie, pry hetym ZŠA daduć tolki słabyja harantyi biaśpieki, piša WSJ.

Scenar 3. Rasija stamlajecca. Rasijskaja ekanomika znachodzicca ŭ stahnacyi, mnohija hramadzianskija haliny skaračajucca. Nizkija ceny na naftu, ukrainskija ŭdary pa NPZ i dziejańni ZŠA i Jeŭropy suprać rasijskaha «cieniavoha fłotu» cisnuć na enierhietyčny siektar, ad jakoha zaležać dachody Kramla.

Biznes-elita Rasii daŭno niezadavolena tym, jak vajna defarmuje ekanomiku, robiačy jaje praźmierna zaležnaj ad vajennaj vytvorčaści, a taksama ad Kitaja, jaki pastaŭlaje technałohii i kuplaje naftu, piša WSJ. Pry hetym pakul, pavodle acenki vydańnia, niama nijakich prykmiet taho, što Pucin turbujecca ab niehatyŭnaj reakcyi z boku elit ci rasijskaha hramadstva.

Tym nie mienš Rasija nie moža vieści vajnu biaskonca. Bolš žorstkija sankcyi i ich bolš strohaje prymianieńnie mohuć paskoryć jaje zaviaršeńnie, piša WSJ.

Kali Rasija ci abodva baki pryjduć da vysnovy, što nie mohuć praciahvać vajnu, pieramovy mohuć pieratvarycca ŭ bolš surjozny pošuk pahadnieńnia.

• 2
• 0
• 1
• 1
• 0
• 5
• 0
• 0