Kruiz na ciepłachodzie «Biełaja Ruś» pa rekach Paleśsia kaštuje jak adpačynak u Turcyi. Ale kajuty na viasnu-leta amal vykuplenyja

«Treba było braniravać jašče vosieńniu!» — kažuć u adnoj z turystyčnych firm. Kali płanavać vandroŭku na červień, dyk zastałasia volnaj tolki adna kajuta kłasa ekanom — za 6360 rubloŭ.

Fota tut i dalej: infoflot.com

U pieršy kruiz ciepłachod «Biełaja Ruś» adpravicca sioleta 11 krasavika pa maršrucie Brest — Kobryn — Dubaje — Pinsk — Stachava — Turaŭ — Laskavičy — Navasiołki — Naroŭla — Mazyr. Hety maršrut nazyvajecca «Začaravańnie Paleśsia — 1» (isnujuć i inšyja varyjanty) i praciahniecca 8 dzion.

Turystyčnaja prahrama nastupnaja: pačynajecca ŭsio z ekskursii pa Bresckaj krepaści, na nastupny dzień zapłanavana naviedvańnie vajenna-histaryčnaha muzieja imia Suvorava ŭ Kobrynie. Jość jašče muziej Dzieda Tałaša. Ź nievajskovych muziejaŭ prapanoŭvajuć muziej pryrody ŭ Laskavičach i krajaznaŭčy muziej «Zamkavaja Hara» ŭ Mazyry.

U astatnija dni haściej viazuć na pradpryjemstvy (naprykład, na małakazavod u Turavie — tam abiacajuć pakazać «syrnuju Italiju ŭ centry Paleśsia») ci pa kramach (u Naroŭli heta firmovaja krama «Čyrvony Mazyranin»).

U zaviaršeńni kruizu adbudziecca hała-viačera na borcie ciepłachoda. Haściej navat prosiać prytrymlivacca dres-kodu: dla mužčyn heta kaścium z halštukam, a dla žančyn — viačerniaja sukienka.

Ceny za čałavieka ŭ hetym kruizie pačynalisia ad 2872 rubloŭ. I ŭsie miescy ŭžo raskupleny. Kruiz pa biełaruskich rekach aktyŭna pradajuć rasijskija turapieratary — praź ich sajty, darečy, usie kajuty ŭžo zareziervavanyja ažno da červienia.

Čytačka «Našaj Nivy» źviarnułasia ŭ biełaruskuju turfirmu, jakaja taksama pradaje tury na ciepłachod «Biełaja Ruś». Tam adznačyli, što davoli pozna zajmacca braniravańniem — treba było rabić heta jašče letaś vosieńniu. Bo siońnia tym, chto vandruje paraj, mohuć prapanavać u červieni tolki adzin varyjant: volnaja adna dvuchmiesnaja kajuta — kaštuje jana 3180 rubloŭ za čałavieka.

A za adnamiesnuju ekanom-kajutu na lipień z maleńkim iluminataram zamiest akna prosiać užo 3868 rubloŭ. Luks dla dvuch čałaviek abydziecca pryblizna 14 200 rubloŭ — heta amal što $5000 u ekvivalencie, supastaŭna z adpačynkam u lubimaj biełarusami Turcyi.

Dla paraŭnańnia: letaś za luks na «Biełaj Rusi» prasili 13 730 rubloŭ za dvaich.

U košt kruizu pa Biełarusi ŭvachodzić čatyrochrazovaje charčavańnie pa sistemie «ŭsio ŭklučana» (śniadanak, abied, pićcio harbaty dniom i viačera) i ałkaholnyja napoi. Ale kali letaś haściam prapanoŭvali nie tolki ajčynny, ale i zamiežny ałkahol, to sioleta pakinuli tolki biełaruski.

Dapłačvać za ekskursii na maršrucie nie treba.

Usiaho na siezon 2026 hoda zapłanavana 27 kruizaŭ — apošni startuje 10 kastryčnika.

Nahadajem: «Biełaja Ruś» — pieršy i adziny kruizny ciepłachod u Biełarusi. Jon byŭ pabudavany ŭ 2016 hodzie na sudnabudaŭničym zavodzie ŭ Pinsku. Pryznačany dla kruizaŭ pa rekach Paleśsia, uklučajučy Dniaproŭska-Buhski kanał, Muchaviec, Pinu i Prypiać.

Daŭžynia sudna 50 mietraŭ, šyrynia 7 mietraŭ. Tut jość 16 kajut roznych katehoryj — ad ekanom da luks. Darečy, luksy nazvany ŭ honar Janki Kupały i Jakuba Kołasa.

Kamientary da artykuła