U Biełarusi možna pažyć va ŭłasnaj burbałcy. Dziaŭčyna pakazała niezvyčajny hatel siarod lesu
Dziaŭčyna pakazała, jak žyła ŭ całkam prazrystaj burbałcy: «Čuvać tolki huki daždžu i liścia». Ale jaje entuzijazm padzialajuć nie ŭsie: «Moža, mańjak za taboj naziraje».
Adzin z samych niezvyčajnych hatelaŭ Biełarusi znachodzicca za 30 kiłamietraŭ ad Minska — niedaloka ad Rakava. Numaroŭ (kali ich možna tak nazvać) usiaho try — i ŭjaŭlajuć saboj pakoi całkam prazrystyja burbałki.
Z adnaho boku, ty možaš bačyć usio navokał u lubuju paru hoda. Ź inšaha — ty taksama žyvieš byccam by ŭnutry akvaryuma. Stvaralniki zapeŭnivajuć: chvalavacca niama praz što, bo znachodziacca «burbałki» na pryvatnaj terytoryi, jakaja achoŭvajecca. To-bok vypadkovy čałaviek na vas hladzieć nie pryjdzie. Ale tyja, chto ŭžo adpačyŭ u hateli Bubble, pišuć, što vosieńniu i zimoj usio ž možna pabačyć inšych turystaŭ.
Unutry «burbałak» jość vialiki łožak, kandycyjanier, mikrachvaloŭka, čajnik, posud, ručniki dy razietki. A voś unitaz u prazrysty pakojčyk pa zrazumiełaj pryčynie stavić nie stali. Tualet i duš (apošnim možna karystacca vyklučna letam) znachodziacca na vulicy. Tam ža praduhledžana zona barbiekiu, dzie možna hatavać ježu.
Kali samastojna hatavać niama žadańnia, to za piać kiłamietraŭ jość restaran, adkul možna zamović dastaŭku.
Źjaviŭsia hatel Bubble jašče ŭ 2020 hodzie, kali praz pandemiju karanavirusa krainy pazakryvali miežy, a biełarusy pačali šukać varyjanty cikava adpačyć na radzimie.
Dva z troch «numaroŭ» — heta sapraŭdnyja šary, jakija nieabchodna pieryjadyčna padździmać (dla hetaha dystancyjna ŭstalavanaja admysłovaja pompa i prakładzienyja pavietranyja trosy). Šar maje dyjamietr pa padłozie 4,2 mietra, jaho vyšynia — kala 3,5‑4 mietraŭ. Treci «numar» zrobleny z polikarbanatu, tamu maje stałuju formu.
Haściej hatel moža prymać da taho momantu, pakul na vulicy nie budzie chaładniej za -10 hradusaŭ. Pieranačavać tut kaštuje 350 rubloŭ.
Pra svoj adpačynak tam u tyktoku raspaviała biełaruskaja błohierka Kaciaryna Cechavaja. Jana zastałasia ŭ zachapleńni:
— Kali znachodzišsia ŭnutry, poŭnaje adčuvańnie, byccam śfiery niama i ty žyvieš prosta na pryrodzie. Čuvać tolki huki daždžu, liścia, a pobač žurčyć ručaj. Unutry ciopła i ŭtulna, łožak z padahrevam.
Jaje rolik nabraŭ 285 tysiač prahladaŭ i bolš za 10 tysiač łajkaŭ. A voś u kamientaryjach źjavilisia ludzi, jakija adpačyvali ŭ tych burbałkach, i nie ŭsie ź ich zastalisia zadavolenymi.
«Nie kaštuje svaich hrošaj, vosieńniu choładna, duš daloka, tualet na vulicy chałodny, chaładzilnika niama, televizara taksama. Ščyra, vykinutyja hrošy. Za hetuju sumu možna było arandavać narmalny dom, my byli zasmučanyja, navat nočču źjechali praz choład», — napisała adna dziaŭčyna.
«Atmaśfiera sapraŭdy krutaja, byli ŭ mai. Ale svaich hrošaj nie kaštuje», — dadała inšaja.
Niechta chvalujecca pra biaśpieku i ličyć taki hatel maraj mańjaka. Ale bolšaść kamientataraŭ u zachapleńni ad idei takoha adpačynku.
Zdajecca, dziaŭčyna znajšła samaje instahramnaje miesca dla adpačynku ŭ Biełarusi. Ale košt hłempinhu nie dla słabaniervovych
Dziaŭčyna arandavała na dzień narodzinaŭ zamak pad Minskam — i ŭzarvała tyktok
U sialanskaj chacie abo ŭ zamku. Dzie ŭ Biełarusi možna pažyć u histaryčnym budynku i kolki heta kaštuje?
Piać luksavych hatelaŭ Biełarusi, jakija znachodziacca ŭ nievialikich haradach. Vy dakładna pra ich nie viedali
Ciapier čytajuć
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2727
Kamientary