Ekśpierymient nahladna pakazaŭ, jak lohka naduryć čałavieka praz štučny intelekt

Minskaja milicyja prademanstravała ekśpierymient, jaki pakazvaje, nakolki lohka z dapamohaj štučnaha intelektu možna padmanuć čałavieka. Dla hetaha spatrebiłasia ŭsiaho kala paŭchviliny razmovy z dobraachvotnaj udzielnicaj.

Zdymak ilustracyjny: freepik.com

Dziejańnie adbyvałasia ŭ pačatku praśpiekta Pieramožcaŭ. Dziaŭčyna skazała ŭ mikrafon niekalki niejtralnych fraz pra svoj dzień i samaadčuvańnie. Na padstavie hetaha supracoŭnik milicyi z dapamohaj ŠI zhienieravaŭ paviedamleńnie, nibyta ad imia dziaŭčyny, i adpraviŭ jaho jaje maci.

U tekście havaryłasia, što «dačka» znachodzicca na manikiury, u jaje nie pracuje bankinh, i jana prosić pieraličyć majstru 45 rubloŭ.

Nieŭzabavie ŭ videa pakazali skrynšot pierapiski: maci ŭdakładniła sumu, a paśla adpraviła hrošy i paćvierdziła apłatu. Paśla hetaha dziaŭčyna patelefanavała maci i rastłumačyła, što ŭsio heta było častkaj ekśpierymientu.

Supracoŭnik milicyi pacikaviŭsia ŭ žančyny, ci ŭźnikali ŭ jaje sumnieńni, što heta piša sapraŭdy dačka. Maci adkazała, što nijakich padazreńniaŭ nie było i jana całkam pavieryła paviedamleńniu.

Naprykancy rolika milicyjanier paabiacaŭ viarnuć hrošy nazad i paraiŭ dziaŭčynie pravieści z maci prafiłaktyčnuju razmovu, kab paźbiehnuć padobnych situacyj.

Kamientary da artykuła