Paŭdniovaja Kareja pieršaj u śviecie pačała rehulavać štučny intelekt. Ciapier tam abaviazkova markirujuć ŠI-vyjavy

Ułady Paŭdniovaj Karei zajaŭlajuć, što novyja zakony zaklikanyja ŭmacavać davier ludziej da štučnaha intelektu i harantavać biaśpieku.

Ministerstva navuki i infarmacyjnych technałohij Paŭdniovaj Karei acharaktaryzavała hety zvod zakonaŭ jak druhi ŭ śviecie takoha kštałtu.

Jeŭrapiejski parłamient u červieni 2024 hoda ŭchvaliŭ, jak śćviardžajecca, «pieršyja ŭ śviecie praviły adnosna ŠI». Adnak, u adroźnieńnie ad Jeŭrapiejskaha sajuza, dzie kompleks zakonaŭ ab rehulavańni štučnaha intelektu budzie ŭvodzicca paetapna da 2027 hoda, paŭdniovakarejski anałah pačaŭ dziejničać adrazu ŭ poŭnym abjomie.

U śviecie pa-raniejšamu isnujuć roznahałośsi nakont taho, jak rehulavać ŠI. ZŠA addajuć pieravahu bolš miakkamu padychodu, kab nie strymlivać inavacyi. Kitaj taksama ŭvioŭ šerah praviłaŭ i prapanavaŭ stvaryć orhan dla kaardynacyi hłabalnaha rehulavańnia.

Što praduhledžvajuć zakony

Pavodle novaha paŭdniovakarejskaha zakanadaŭstva, kampanii pavinny zabiaśpiečyć kantrol čałavieka nad tak zvanym «vysokaefiektyŭnym» ŠI, u tym liku ŭ takich śfierach, jak jadziernaja biaśpieka, vytvorčaść pitnoj vady, transpart, achova zdaroŭja i finansavyja pasłuhi (naprykład, acenka kredytazdolnaści i pravierki pierad vydačaj kredytaŭ).

Inšyja praviły patrabujuć, kab kampanii zahadzia infarmavali karystalnikaŭ pra pradukty abo pasłuhi, u jakich vykarystoŭvajecca vysokaefiektyŭny abo hienieratyŭny ŠI, a taksama vyrazna markiravali vyniki, atrymanyja z dapamohaj ŠI. Heta, u tym liku, datyčycca dypfejkaŭ, jakija ciažka adroźnić ad realnaści.

Ułady nie majuć namieru adrazu karać parušalnikaŭ novaha zakanadaŭstva. Kampanijam budzie dadzieny hadavy lhotny pieryjad, paśla čaho za parušeńni zakona pačnuć nakładać administracyjnyja štrafy.

Adnak hetyja štrafy mohuć być značnymi: naprykład, za adsutnaść markiroŭki hienieratyŭnaha ŠI praduhledžany štraf u pamiery da 30 miljonaŭ von (20 400 dalaraŭ ZŠA).

Praŭda, u paraŭnańni ź ES hetyja sumy nievialikija. U Jeŭropie nievykanańnie praviłaŭ moža pryvieści da štrafaŭ ad 1% hłabalnaha abarotu kampanii za niaznačnyja parušeńni i da 7% — za parušeńnie zabaronaŭ na vykarystańnie ŠI z vysokim uzroŭniem ryzyki.

Tym časam mnohija zasnavalniki i kiraŭniki paŭdniovakarejskich technałahičnych kampanij rasčaravanyja, zajaviŭ Lim Čunh-vuk, sukiraŭnik Startup Alliance. «Isnuje peŭnaje niezadavalnieńnie — čamu my pavinny być pieršymi, chto heta robić?» — adznačyŭ jon.

Na dumku Startup Alliance, niekatoryja farmuloŭki zakona prapisanyja niedastatkova dakładna, i kampanii mohuć pa zmaŭčańni vybirać bolš biaśpiečnyja, ale mienš inavacyjnyja padychody, kab paźbiehnuć ryzyk.

Prezident Paŭdniovaj Karei Li Čže Mion u čaćvier zaklikaŭ palitykaŭ prysłuchacca da aściaroh pradstaŭnikoŭ haliny i zabiaśpiečyć dastatkovuju padtrymku vienčurnym kampanijam i startapam.

«Važna maksimalna vykarystoŭvać patencyjał haliny z dapamohaj instytucyjanalnaj padtrymki, adnačasova papiaredžvajučy čakanyja pabočnyja efiekty», — zajaviŭ jon.

Ministerstva navuki i infarmacyjnych technałohij płanuje stvaryć na pierachodny pieryjad płatformu z rekamiendacyjami i śpiecyjalny centr padtrymki dla kampanij.

«Akramia taho, my praciahniem razhladać miery pa minimizacyi nahruzki na halinu», — paviedamiŭ pradstaŭnik ministerstva. Jon dadaŭ, što ŭłady razhladajuć mahčymaść padaŭžeńnia lhotnaha pieryjadu, kali hetaha zapatrabuje situacyja ŭ halinie.

• 2
• 0
• 0
• 0
• 0
• 0
• 0
• 0