Alijeŭ abvinavaciŭ Kreml u śviadomych udarach pa azierbajdžanskim pasolstvie ŭ Kijevie

Pra toje, što Rasija biła pa azierbajdžanskim pasolstvie ŭ Kijevie naŭmysna, prezident Azierbajdžana Ilcham Alijeŭ zajaviŭ padčas panelnaj dyskusii na Miunchienskaj kanfierencyi ab biaśpiecy.

Prezident Azierbajdžana Ilcham Alijeŭ. Fota: azertag.az

Sa słoŭ Alijeva, dypłamatyčnaje pradstaŭnictva Azierbajdžana va ŭkrainskaj stalicy traplała pad abstreł trojčy. Praŭda, paśla pieršaha vypadku ŭ Baku dapuskali, što heta mahła być vypadkovaść.

Azierbajdžan tady navat pieradaŭ rasijskamu boku kaardynaty svaich abjektaŭ u Kijevie — pasolstva, konsulskaha adździeła i kulturnaha centra. Adnak paśla hetaha adbylisia jašče dva ŭdary. Alijeŭ nazvaŭ heta metanakiravanaj atakaj i niedružalubnym krokam z boku Rasii.

Jon taksama paviedamiŭ, što MZS Azierbajdžana vyklikała rasijskaha pasła i ŭručyła notu pratestu paśla padzieńnia rakiety na terytoryju pasolstva. Sa słoŭ Alijeva, Baku dziejničaje vyklučna ŭ dypłamatyčnym farmacie.

14 lutaha ŭ Miunchienie Ilcham Alijeŭ sustreŭsia z prezidentam Ukrainy Uładzimiram Zialenskim. Zialenski paviedamiŭ pra nastupstvy rasijskich udaraŭ pa enierhietyčnaj infrastruktury i padziakavaŭ Azierbajdžanu za enierhietyčnuju dapamohu.

Rasijskija ŭłady raniej nieadnarazova zajaŭlali, što nanosiać udary tolki pa vajskovych i źviazanych ź imi abjektach. Paśla incydentu z azierbajdžanskim pasolstvam u listapadzie 2025 hoda rasijski MZS vykazaŭ škadavańnie i paviedamiŭ papiaredniuju viersiju, pavodle jakoj rakieta mahła ŭpaści ŭ vyniku niekarektnaj pracy ŭkrainskaj sistemy supraćpavietranaj abarony. U Maskvie padkreślili, što śćviardžeńni pra naŭmysnyja ŭdary nie adpaviadajuć rečaisnaści.

Kamientary da artykuła