U Polščy chočuć uskładnić atrymańnie karty palaka. Što pamianiajecca?
MZS Polščy choča ŭvieści płatu za vydaču karty palaka i likvidavać mahčymaść atrymańnia hetaha dakumienta pa chadajnictvie polskaj arhanizacyi. Heta vynikaje z prajekta źmianieńniaŭ u zakon ab karcie palaka. Novaja redakcyja pavinna być pryniata ŭradam u druhim kvartale 2026 hoda, piša Most.
Fota: Most
Karta palaka — dakumient, jaki śviedčyć pra prynaležnaść da polskaha naroda. Jana palahčaje lehalizacyju ŭ Polščy, a taksama dazvalaje pretendavać na materyjalnuju dapamohu i padatkovyja lhoty pry repatryjacyi ŭ hetuju krainu.
Asnoŭnaje zapłanavanaje novaŭviadzieńnie — u tym, što kartu palaka možna budzie atrymać tolki pa polskich karaniach. MZS choča zakryć mahčymaść padavać u jakaści dokazu chadajnictvy polskich abo dyjasparnych arhanizacyj, jakija śviedčać pra ŭklučanaść zajaŭnika ŭ ich dziejnaść na praciahu nie mienš čym troch hadoŭ. Pieršapačatkova aktyvizm u śfiery prasoŭvańnia polskaj movy i kultury byŭ praduhledžany jak alternatyva dokazu polskaha pachodžańnia.
Inicyjatary zakonaprajekta adznačajuć, što raniej pry razhladzie zajaŭ fiksavalisia vypadki, kali dakładnaść padadzienych daviedak vyklikała sumnievy. Akramia taho, raspracoŭščyki adznačajuć, što ŭ ciapierašniaj redakcyi zakon dziejničaŭ 17 hadoŭ, a hetaha było dastatkova, kab zacikaŭlenyja ŭ atrymańni karty palaka, jakija nie mohuć paćvierdzić polskija karani, mahli chadajničać ab vydačy dakumienta.
Taksama ŭ zakon uniasuć punkt, što kali hramadzianin Polščy raniej admoviŭsia ad polskaha hramadzianstva, to jon hublaje i prava na kartu palaka.
Jašče adno novaŭviadzieńnie — źmiena pieraliku pravoŭ uładalnikaŭ karty palaka. Ale ŭ papiarednie apublikavanaj infarmacyi niama kankretyki pa hetaj normie.
Kali ŭładalnik karty palaka repatryjujecca ŭ Polšču i atrymlivaje dazvoł na pastajannaje pražyvańnie, to dapamohu, jakaja jamu naležyć, prapanujecca vypłačvać paśla vydačy DNŽ adnarazova, a nie na praciahu dzieviaci miesiacaŭ.
Płanujecca ŭvieści zbor za razhlad zajavy ab vydačy karty palaka, padaŭžeńnie terminu jaje dziejańnia abo vydaču novaj karty ŭ suviazi sa źmienaj danych. Raspracoŭščyki normy abhruntoŭvajuć heta pracajomkaściu pracesu: treba praanalizavać dakumienty zajaŭnika, acanić jaho viedańnie polskaj movy, tradycyj i zvyčajaŭ.
Taksama płanujecca pašyryć abjom danych, jakija padajuć zajaŭniki, kab palehčyć ich analiz z punktu hledžańnia biaśpieki.
«Likvidujem uspadkavanyja patałohii»
Uskładnieńnie ŭmoŭ vydačy kartaŭ palaka było praduhledžana mihracyjnaj stratehijaj, pryniataj uradam Polščy ŭ kastryčniku 2024 hoda, a taksama stratehijaj supracoŭnictva z palakami za miažoj, pryniataj u krasaviku 2025 hoda.
U žniŭni 2025 hoda, adkazvajučy na pytańnie pra złoŭžyvańni pry vydačy kart palaka, ministr zamiežnych spraŭ Polščy Radasłaŭ Sikorski napisaŭ:
«Prablema realnaja, i tamu my ŭžo pracujem nad uniasieńniem papravak u zakon. My likvidujem uspadkavanyja patałohii ŭ mihracyjnaj palitycy».
Čytajcie taksama:
Kaniec «mutnaj schiemy». Što zaraz budzie z polskimi pracoŭnymi vizami dla biełarusaŭ