«Nie chaču čuć «śpierdalaj da Ukrainy» tolki tamu, što razmaŭlaju z baćkami pa telefonie na ruskaj». Biełarusy dzielacca, čamu viartajucca z Polščy
U sacsietkach razharełasia haračaja dyskusija.
Arenda kvatery — vyrašalnaje pytańnie?
«Jość tut takija, chto žyŭ u Polščy i viarnuŭsia nazad u Biełaruś?» — spytała biełaruska ŭ Threads.
Dziaŭčyna adznačyła ŭ svaim dopisie, što paśla amal 4 hadoŭ u Polščy viarnułasia pierš za ŭsio praz žytło, bo kožny miesiac u Varšavie jana płaciła za kvateru pa 1000 dalaraŭ, a ŭ Minsku ŭ jaje jość svaja kvatera.
«Ale ja ŭsio hetak ža sumuju pa dasiažnaści ŭsiaho i rytmu žyćcia. Dzialiciesia, a čamu vy viarnulisia i jak vam tut», — pytajecca aŭtarka dopisu.
«Klučavy momant — svaja kvatera ŭ Minsku. Na ciapierašni momant i tut možna ašaleć ad arendy i kupli žylla», — zaŭvažajuć kamientatary. Mnohija dadajuć, što ciapier hodnaja kvatera ŭ Minsku zdajecca za 600—700 dalaraŭ na miesiac.
«Mieć mahčymaść viartacca ŭ Biełaruś — pryvilej (i ja ščyra radaja za tych, chto realna moža viartacca). Značyć, doma ničoha nie pahražała, i pryčyny pierajezdu byli ekanamičnyja, a nie palityčnyja», — hučyć kamientar, napisany pa-biełarusku.
«Jak možna dobraachvotna viarnucca ŭ bałota?» — zadajecca pytańniem inšaja žančyna.
«Žyvu ŭ Krakavie, svajo žyllo, nie ŭjaŭlaju ŭžo žyćcio ŭ RB, mnie tam niama čaho rabić. Tut praca, chobi, siabry, padarožžy. A kaliści było vielmi składana pierajazdžać», — dzielicca dośviedam inšaja.
Ale siarod kamientataraŭ chapaje tych, chto, jak i aŭtarka dopisu, paśla žyćcia ŭ Polščy viarnuŭsia ŭ Biełaruś i nie škaduje.
Pražyli kala 10 hadoŭ u Polščy i viarnulisia ŭ Biełaruś
Adna žančyna napisała, što viarnułasia ŭ Biełaruś dziela lepšaj budučyni dla dziciaci.
«Viarnułasia ŭ Biełaruś ź dziciom. Polšča stała nie taja, jak raniej, dy i svaja kvatera ŭ RB jość. Pieryjadyčna nakatvaje, i vielmi sumuju i chaču viarnucca. Ale vučusia adaptavacca da žyćcia ŭ Biełarusi», — piša jana.
«Nie viarnusia tudy (u Polšču. — NN) dziela dziciaci. Nie chaču čuć chiejt apošnija dva hady «śpierdalaj da Ukrainy» tolki tamu, što ŭ mianie zazvaniŭ telefon i ja razmaŭlaju z baćkami na ruskaj», — dadaje jana.
«Viarnułasia paśla 11 hadoŭ žyćcia ŭ Varšavie, ni pra što nie škaduju», — piša dziaŭčyna, jakaja pierajechała nazad u Minsk.
«Viarnulisia z mužam z Polščy ŭ Biełaruś. Naradzili dzicia, budujem dom, muž pracuje, ja ŭ dekrecie. Rodnyja i siabry pobač. Nie škadujem ab rašeńni. Dom u Polščy my b nie paciahnuli, dy i pra siamju tam zusim dumak nie było — adna praca», — piša inšaja kamientatarka.
«U Minsku ŭ mianie kvatera, siamja, siabry. Ceny razy ŭ dva nižejšyja. Biaspłatnaja miedycyna ci niedarahaja płatnaja. Kuča kruhłasutačnych ustanovaŭ i hipieraŭ. Servis, dzie nie treba stajać u čarzie na vulicy ŭ s*anuju kaviarniu 20 chvilin», — dzielicca jašče adzin mužčyna.
Pradukty tańniejšyja ŭ Biełarusi?
Tyja, chto vyrašyŭ viarnucca, aproč arhumientaŭ pra darahuju nieruchomaść i vysokija arendnyja staŭki, niaredka zhadvajuć prablemy z dakumientami. Inšyja zaŭvažajuć, što biez karty palaka ŭ Polščy niama čaho rabić, bo, maŭlaŭ, žyćcio pieratvarajecca ŭ pastajannuju pahoniu za pracaj i dakumientami.
Admietna, što siarod tych, chto viarnuŭsia z Polščy, chapaje nie tolki minčan.
«Takaja ž historyja, jak u vas, tolki viarnulisia ŭ Hrodna», «Pracavać u Polščy narmalna, ale viarnułasia ŭ svaju kvateru ŭ Breście», — pišuć ludzi ź inšych haradoŭ.
Jość i tyja, chto tolki zadumvajecca pra viartańnie.
«Ja z tych, chto pakul nie viarnuŭsia, ale časta zadumvajecca», — piša šmatdzietnaja maci ź Biełarusi i pieraličvaje plusy i minusy.
«Ceny ŭ RB daloka nie nižejšyja. Tak, na małočku mocna nižejšyja. Na ŭsio astatniaje plus-minus toje samaje, a niešta ŭ Polščy mocna tańniej. Klučavoje — jość svaja kvatera ŭ Biełarusi, a tut zdymać treba. Pakul usio pierakryvaje mahčymaść jeździć pa ES».
Jašče biełaruscy padabajecca polskaja škoła, bo tam nie prymušajuć naviedvać roznyja hurtki.
Znachodziacca i tyja, chto viarnuŭsia ŭ Biełaruś, ale pry hetym kožny dzień sumuje pa Varšavie.
«Ja pražyła ŭ Varšavie 9 hadoŭ. Za žytło ŭ miesiac było $1200, a ŭ Novaj Baravoj svaja kvatera. Viarnulisia siamjoj u pačatku 2024 hoda praz šmat roznych faktaraŭ. Sumuju pa Vavie kožny dzień».
Tym nie mienš mnohija sychodziacca ŭ mierkavańni, što ŭsio ž najaŭnaść žytła ŭ Minsku — adzin z važnych faktaraŭ, jaki moža ŭpłyvać na žadańnie viarnucca.
Aŭtarcy dopisu taksama raili, što pry žadańni jana mahła b pradać kvateru ŭ Novaj Baravoj i nabyć u Varšavie, na što taja adkazała, što dla hetaha nie chapaje jašče minimum 100 tysiač dalaraŭ.
Inšyja naohuł adznačajuć, što pry pierajeździe ŭ Polšču nie abaviazkova jechać u Varšavu ź jaje vysokimi cenami na nieruchomaść. Maŭlaŭ, u małych polskich haradach jość usio, što treba dla kamfortnaha žyćcia.
«Naša Niva» — bastyjon biełaruščyny
PADTRYMAĆ
Kamientary