Byłomu ministru Bryło inkryminujuć chabar paŭtara miljona dalaraŭ

Byłomu ministru sielskaj haspadarki i charčavańnia, a taksama byłomu pamočniku Alaksandra Łukašenki pa Viciebskaj vobłaści Iharu Bryło inkryminujuć atrymańnie chabaru ŭ pamiery 1,5 miljona dalaraŭ. Pra heta paviedamiŭ na pres-kanfierencyi namieśnik hienieralnaha prakurora Biełarusi Alaksiej Stuk.

Ihar Bryło. Skrynšot ź videa

U listapadzie 2023 hoda Bryło byŭ vyzvaleny ad pasady pamočnika Łukašenki. Raniej paviedamlałasia, što jaho zatrymali supracoŭniki KDB u miežach tak zvanaj małočnaj spravy. Pavodle staršyni KDB Ivana Cierciela, pa hetaj spravie zatrymali 26 čałaviek, ź jakich 15 byli aryštavanyja.

Raniej Ihar Bryło zajmaŭ pasadu namieśnika ministra sielskaj haspadarki i charčavańnia (z 2013 hoda), u 2021 hodzie staŭ pieršym namieśnikam ministra, a z 2022 hoda da lipienia 2023 hoda ŭznačalvaŭ ministerstva.

Akramia padrabiaznaściaŭ pa spravie Bryło, Alaksiej Stuk taksama paviedamiŭ, što ciapier rasśledujecca jašče adna karupcyjnaja sprava, u jakoj suma chabaru składaje 600 tysiač dalaraŭ.

Uvohule ž, pavodle jaho słoŭ, u 2025 hodzie kolkaść karupcyjnych złačynstvaŭ źmienšyłasia na 16%. Za minuły hod byli vyjaŭlenyja 843 takija złačynstvy. Najbolšuju dolu siarod ich składajuć atrymańnie chabaru (384 fakty), kradziažy šlacham złoŭžyvańnia słužbovymi paŭnamoctvami (245) i pieravyšeńnie ŭłady (105).

Usiaho ŭstanoŭlena 776 čałaviek, jakija ździejśnili karupcyjnyja pravaparušeńni. Najbolš schilnymi da karupcyi nazvanyja śfiery pramysłovaści (165 faktaŭ), sielskaj haspadarki (178), budaŭnictva (78) i transpartu (93).

Kamientary da artykuła