U reanimacyi Mikałaja Statkieviča try tydni karmili praz trubku

«Akazvajecca, uvieś hety čas jon znachodziŭsia ŭ toj ža kałonii ŭ Hłybokim, ź jakoj jaho vyvieźli ŭ vieraśni, — raspaviała «Novaj haziecie Jeŭropa» Maryna Adamovič.

Mikałaj Statkievič na litoŭska-biełaruskaj miažy 11 vieraśnia 2025 hoda.

«Mikałaj skazaŭ, što jaho jak z kałonii vieźli ź miaškom na hałavie, tak i zvarotnym šlacham, ź miažy ŭ kałoniju, z tym ža miaškom na hałavie i ściažkami na rukach. Ja pisała tudy, u kałoniju. Ja za hetyja miesiacy jeździła tudy trojčy. I mnie nichto ničoha nie skazaŭ, nie daŭ nivodnaha adkazu na maje zvaroty. Ale jon uvieś hety čas byŭ tam.

A infarkt u Mikałaja zdaryŭsia jašče 21 studzienia, i jaho ŭ toj ža viečar pavieźli ŭ Minsk. Mikałaj kaža, što daktary sapraŭdy rabili ŭsio mahčymaje, kab vyratavać jaho žyćcio: try tydni reanimacyi, karmleńnie praz trubku», — raskazała žonka palityka.

***

Pra vyzvaleńnie Mikoły Statkieviča stała viadoma ŭčora, kali źjavilisia jaho foty doma ŭ Minsku.

Kandydat u prezidenty na vybarach 2010 hoda byŭ zatrymany 31 maja 2020 hoda, kali jechaŭ na mitynh Śviatłany Cichanoŭskaj na Kamaroŭku.

14 śniežnia 2021 hoda na zakrytym sudzie ŭ Homieli asudžany na 14 hadoŭ pazbaŭleńnia voli asablivaha režymu pavodle abvinavačańnia ŭ arhanizacyi masavych biesparadkaŭ. Razam ź im asudzili i inšych viadomych apanientaŭ ułady. Pakarańnie adbyvaŭ u kałonii ŭ Hłybokim, apošnija hady ŭtrymlivaŭsia ŭ režymie inkamunikada.

U 2020 hodzie atrymaŭ premiju imia Andreja Sacharava.

11 vieraśnia 2025 hoda Statkieviča niečakana vyzvalili razam ź inšymi 51 palitviaźniami i chacieli prymusova vydvaryć u Litvu. Statkievič, adnak, admoviŭsia pierasiakać miažu i zastaŭsia na terytoryi Biełarusi. Paśla taho, jak jaho zabrali łukašenkaŭskija siłaviki, pra jahony los ničoha nie było viadoma.

Kamientary da artykuła