«Maryna ź Mikołam razmaŭlali ŭsiu noč». Siabroŭka siamji raskazała, što adčuvaje ŭ suviazi z vyzvaleńniem Mikoły Statkieviča

«Radyjo Svaboda» ŭ suviazi z učarašnim niečakanych vyzvaleńniem Mikoły Statkieviča pahavaryła z byłoj redaktarkaj vydańnia «Novy čas» Aksanaj Kołb, jakaja źjaŭlajecca siabroŭkaj siamji Statkieviča i razmaŭlała ź im pa telefonie 11 vieraśnia 2025 hoda.

Mikoła Statkievič i Maryna Adamovič u krasaviku 2019 hoda. Fota: «Radyjo Svaboda»

Aksana Kołb u asabistym paviedamleńni Marynie Adamovič paprasiła jaje, kab jana vybačyłasia pierad Mikołam za tuju razmovu na miažy, kali jana ŭhavorvała jaho pakinuć Biełaruś.

«Ja napisała Marynie, što ja pobač, kali joj niešta budzie treba ci navat prosta parazmaŭlać, i paprasiła, kab jana pieradała Mikołu majo prabačeńnie. Maryna adkazała, što Mikoła pamiataje tuju razmovu…

U toj momant ja dumała tolki pra Marynu, viedajučy, jaki składany ŭ jaje psichałahičny i fizičny stan. I tolki hety matyŭ byŭ hałoŭny, kali ja faktyčna cisnuła na Mikołu i kazała, što kali jon zaraz hetaha nie zrobić, kali jon nie piarojdzie miažu, to jany mohuć i nie pabačycca. Tak, mnie za heta soramna, tak, ja prašu ŭ jaho za heta prabačeńnia…

Što tyčycca Maryny, to siońnia ja vielmi za jaje ščaślivaja. Prosta ciažka navat ujavić, pra što hetaja žančyna prajšła hetyja 5 hadoŭ, a asabliva apošnija miesiacy. Raniej jana chacia b viedała, dzie Mikoła, jana viedała, što jon u Hłybokim, jana mahła pieradavać jamu miedyčnyja pieradačy, mahła tam chacia b raz na hod pieradavać niejkuju ježu. A paśla vieraśnia jana viedała tolki adno, što ŭ jaho niama ciopłych rečaŭ, u jaho niama lekaŭ, u jaho ničoha niama. I jana nie viedaje, dzie jon. I heta było, kaniešnie, strašna…

Ja viedaju, što jany ŭsiu noč razmaŭlali ź Mikałajem. Moža, nie ŭsiu noč, ale vielmi doŭha, i ja razumieju, kolki im treba było ŭsiaho adzin adnamu skazać. Spadziajusia, što stan u Mikałaja nie vielmi ciažki. Pa fota bačnyja nastupstvy infarktu hałaŭnoha mozhu, ale jon — čałaviek mocny, jon adnovicca. Ja ŭpeŭnienaja, što navat kali b jon zusim nie moh razmaŭlać, jany b z Marynaj usio roŭna razmaŭlali ŭsiu noč, bo jany razmaŭlajuć svaimi sercami».

Pra vyzvaleńnie Mikoły Statkieviča stała viadoma ŭčora, kali źjavilisia jaho foty doma ŭ Minsku.

Kandydat u prezidenty na vybarach 2010 hoda byŭ zatrymany 31 maja 2020 hoda, kali jechaŭ na mitynh Śviatłany Cichanoŭskaj na Kamaroŭku.

14 śniežnia 2021 hoda na zakrytym sudzie ŭ Homieli asudžany na 14 hadoŭ pazbaŭleńnia voli asablivaha režymu pavodle abvinavačańnia ŭ arhanizacyi masavych biesparadkaŭ. Razam ź im asudzili i inšych viadomych apanientaŭ ułady. Pakarańnie adbyvaŭ u kałonii ŭ Hłybokim, apošnija hady ŭtrymlivaŭsia ŭ režymie inkamunikada.

U 2020 hodzie atrymaŭ premiju imia Andreja Sacharava.

11 vieraśnia 2025 hoda Statkieviča niečakana vyzvalili razam ź inšymi 51 palitviaźniami i chacieli prymusova vydvaryć u Litvu. Statkievič, adnak, admoviŭsia pierasiakać miažu i zastaŭsia na terytoryi Biełarusi. Paśla taho, jak jaho zabrali łukašenkaŭskija siłaviki, pra jahony los ničoha nie było viadoma.

Kamientary da artykuła