Nočču ŭkrainskija drony atakavali hazapierapracoŭčy zavod u Samarskaj vobłaści

U noč na 21 lutaha atacy ŭkrainskich dronaŭ padvierhłasia rasijskaja Samarskaja vobłaść. Pavodle paviedamleńniaŭ telehram-kanałaŭ Supernova i Exilenova+, u vyniku ŭdaru byŭ zakranuty Niefciahorski hazapierapracoŭčy zavod, jaki naležyć kampanii «Rasnafta» i zajmajecca pierapracoŭkaj pryrodnaha i spadarožnaha naftavaha hazu.

Skrynšot ź videa

Papiarednie paviedamlałasia pra ŭzharańnie niekalkich reziervuaraŭ z palivam. Taksama ahoń nibyta zakranuŭ susiedniaje pradpryjemstva pa stabilizacyi nafty.

Hubiernatar rehijona Viačasłaŭ Fiedaryščaŭ zajaviŭ, što ataka pryjšłasia pa dvuch pramysłovych placoŭkach, pry hetym paciarpiełych niama. Zavod pracuje z 1967 hoda i vyrablaje roznyja vidy paliva i hazavuju pradukcyju, jaho prajektnaja mahutnaść składaje kala 0,73 miljarda kubamietraŭ hazu ŭ hod.

Raniej paviedamlałasia taksama, što pad udar, mahčyma, ukrainskaj rakietaj «Fłaminha», pozna ŭviečary 20 lutaha trapiŭ zavod u Votkinsku, jaki znachodzicca ŭ rasijskaj Udmurcii i vypuskaje rakiety «Iskander-M», «Topal-M» i «Arešnik».

Pavodle zvodki rasijskaha Minabarony, u tuju samuju noč srodki supraćpavietranaj abarony nibyta pierachapili 77 bieśpiłotnikaŭ nad niekalkimi rehijonami Rasii, Krymam i akvatoryjaj Azoŭskaha mora, u tym liku piać — nad Samarskaj vobłaściu.

Kamientary da artykuła