U Pskoŭskaj vobłaści haryć naftabaza — drony prabili achoŭnuju sietku
U siecivie źjaviłasia vielizarnaja kolkaść videa pažaru na naftabazie ŭ Vialikich Łukach Pskoŭskaj vobłaści RF paśla ataki bieśpiłotnikaŭ.
Heta pradpryjemstva, jakoje naležyć TAA «Pskoŭnaftapradukt», užo stanaviłasia metaj dla dronaŭ u krasaviku 2024 hoda, adnak hetym razam nastupstvy byli bolš surjoznymi.
Pavodle analizu ASTRA, kadry źniatyja z terytoryi Vialikałuckaha miasakambinata, raźmieščanaha na adrasie: Liciejnaja vuł., 17. Rabotniki hetaha kambinata, pa ŭsioj vierahodnaści, i ŭciakajuć na videa ŭ pieršyja chviliny paśla ataki. Adlehłaść ad miesca zdymki da naftabazy — kala 300 mietraŭ.
Nad reziervuarami naftabazy była ŭstalavana śpiecyjalnaja achoŭnaja sietka. Adnak, pavodle źviestak OSINT-analitykaŭ i śviedčańniaŭ vidavočcaŭ, niekalkim dronam udałosia prabić hetuju kanstrukcyju, što i vyklikała bujny pažar.
Vialikałuckaja naftabaza źjaŭlajecca stratehična važnym vuzłom dla rehijona. Tam zachoŭvajucca bienzin i dyzielnaje paliva, jakija adhružajucca dla sietak AZS, transpartnych kampanij i miascovych pradpryjemstvaŭ.
Minabarony RF spravazdačyłasia pra 113 ukrainskich bieśpiłotnikaŭ, źbitych za noč nad rasijskimi rehijonami — nad Branskaj vobłaściu, Smalenskaj, nad Ćviarskoj, nad Naŭharodskaj vobłaści, nad Leninhradskaj, nad Kałužskaj. Pry hetym u zvodcy nie zhadvajecca Pskoŭskaja vobłaść, dzie BPŁA atakavali naftabazu.
Kamientary