Spyniŭ pracu «Hiote-instytut u vyhnańni»

Niamieckaja kulturnaja prahrama «Hiote-instytut u vyhnańni» zaviaršyła svaju dziejnaść. Pra heta paviedamili pradstaŭniki instytuta ŭ sacyjalnych sietkach, adznačyŭšy, što rašeńnie pryniataje z-za składanaj situacyi ŭ śviecie i niedachopu finansavych mahčymaściaŭ, piša Reform.news.

Śpiektakl Juryja Dzivakova Clausa fores z Alaksandram Kaziełam u hałoŭnaj roli padčas fiestyvalu biełaruskaj kultury ŭ Bierlinie, jaki ładziŭ Hiote-Instytut u vyhnańni. Fota: Tomasz Kulbowski

Pavodle słoŭ pradstaŭnikoŭ prahramy, uzmocnieny cisk i abmiežavanyja resursy bolš nie dazvalajuć praciahvać pracu ŭ raniejšym farmacie. Tamu ŭsie padziei, zapłanavanyja na 23 lutaha 2026 hoda, byli admienienyja.

Razam z tym instytut i nadalej maje namier padtrymlivać mastakoŭ, jakija apynulisia ŭ emihracyi, i dałučać ich da mižnarodnych kulturnych prajektaŭ, kab ich hałasy hučali ŭ Hiermanii i ŭ śviecie.

Prahrama była stvoranaja jak placoŭka dla sustreč, abmienu dumkami i tvorčych vystupaŭ dla dziejačaŭ kultury z krain, dzie z-za vajny abo cenzury kulturnyja ŭstanovy vymušana spyniali pracu. Jana dapamahała raskazvać pra dośvied vymušanaha pierajezdu, pra žyćcio na miažy kultur, pra novyja pačatki i raznastajnaść mastackich asiarodkaŭ u dyjaspary.

Dziakujučy hetaj inicyjatyvie prachodzili i mierapryjemstvy, pryśviečanyja biełaruskaj kultury: dyskusii, kancerty, śpiektakli, vystavy, kinapakazy, prezientacyi knih i inšyja padziei. U sakaviku 2024 hoda byŭ arhanizavany maštabny fiestyval biełaruskaj kultury, jaki abjadnaŭ tvorcaŭ, što vymušana pakinuli Biełaruś i žyli ŭ roznych jeŭrapiejskich haradach. U im uziali ŭdzieł bolš za piaćdziasiat pradstaŭnikoŭ roznych kirunkaŭ mastactva — ad teatra i kino da litaratury, muzyki i fiłasofii.

Kamientary da artykuła