Na nastupnym tydni vyjdzie na ekrany film pa knizie-biestsielery biełaruskaj piśmieńnicy

Pa knizie-biestsielery biełaruskaj ruskamoŭnaj piśmieńnicy Volhi Prymačenki źniali kamiedyju «Piaščotna da siabie», jakaja vyjdzie ŭ prakat z 5 sakavika. Aŭtarka adnajmiennaj knihi-miedytacyi ŭpieršyniu pasprabavała siabie ŭ hetym filmie i jak aktrysa.

Fota: kinopoisk.ru

Stužka raskazvaje pra paśpiachovuju doktarku-otałarynhołaha Nadziu, jakoj spoŭniłasia 40 hadoŭ i jakaja raptam zrazumieła, što amal ničoha nie viedaje pra siabie. Jana štodnia dapamahaje pacyjentam, ale ŭłasnyja pačućci nibyta pierastała čuć. Muž pajšoŭ ad jaje dva hady tamu, adnosiny z dačkoj-padletkam stanoviacca ŭsio bolš napružanymi. Hierainia šukaje źmienaŭ, kab znoŭ adčuć radaść i luboŭ da žyćcia. Razam ź joj hledačam prapanujuć prajści šeść svojeasablivych «urokaŭ piaščoty» i navučycca lepš razumieć siabie.

U filmie źnialisia Karyna Razumoŭskaja, Arciom Tkačenka, Alisa Kanašenkava i inšyja viadomyja rasijskija akciory. Režysioram ekranizacyi staŭ Ivan Kitajeŭ, scenaryj napisała Darja Hracevič.

Sama Volha Prymačenka taksama źjavicca ŭ karcinie ŭ nievialikim epizodzie — u roli pakupnicy kvatery. Jana pryznałasia, što zdymki stali dla jaje składanym i chvalujučym dośviedam: havaryć tekst pierad vialikaj zdymačnaj hrupaj akazałasia niaprosta. Pavodle jaje słoŭ, akciorskaja prafiesija patrabuje vialikaha talentu i ŭmieńnia chutka ŭvasablacca ŭ roznyja vobrazy, i hety dośvied dapamoh joj ź jašče bolšaj pavahaj pastavicca da pracy akcioraŭ i režysiora.

Akramia taho, piśmieńnica ahučyła dla filma terapieŭtyčny padkast «Piaščotna da siabie», jaki pa siužecie słuchajuć hałoŭnyja hieraini.

Kniha «Piaščotna da siabie», napisanaja ŭ 2020 hodzie na asnovie asabistaha dośviedu aŭtarki, zakranaje temy pryniaćcia siabie, svaich pačućciaŭ i miežaŭ, a taksama ŭmieńnia kłapacicca pra ŭłasny ŭnutrany stan. Vydańnie ŭvajšło ŭ piaciorku samych papularnych non-fikšn-knih, a ahulny nakład usich viersij pieravysiŭ try miljony asobnikaŭ.

Kamientary da artykuła