Udary Izraila i ZŠA pa Iranie pryviali da zakryćcia važnych naftahazavych abjektaŭ na Blizkim Uschodzie

Užo treci dzień praciahvajecca abmien udarami pamiž Izrailem i ZŠA z adnaho boku i Iranam — z druhoha. Na hetym fonie šerah naftavych i hazavych pradpryjemstvaŭ u rehijonie byli vymušanyja spynić pracu, piša The Moscow Times.

Fota: Drew Irving

Saudaŭskaja Aravija časova zakryła najbujniejšy naftapierapracoŭčy zavod Ras Tanura paśla ataki bieśpiłotnika. Hety kompleks uklučaje adzin z samych mahutnych NPZ na Blizkim Uschodzie (kala 550 tysiač baralaŭ za sutki) i źjaŭlajecca klučavym ekspartnym terminałam saudaŭskaj nafty.

U Irakskim Kurdystanie kampanii, jakija zdabyvajuć kala 200 tysiač baralaŭ nafty ŭ sutki dla ekspartu praz turecki port Džejchan, prypynili pracu ŭ jakaści miery zaściarohi. Paviedamleńniaŭ pra paškodžańni niama, adnak zdabyču spynili previentyŭna.

Izrail taksama zahadaŭ kampanii Chevron časova spynić zdabyču na bujnym marskim radoviščy «Levijafan», dzie ciapier pavialičvajuć mahutnaści ŭ miežach šmatmiljardnaha kantraktu na pastaŭki hazu ŭ Jehipiet.

U Iranie paviedamlałasia pra vybuchi na vostravie Chark, praź jaki prachodzić asnoŭnaja častka ekspartu iranskaj nafty. Pakul nieviadoma, nakolki mocna paciarpieła infrastruktura.

Iran — treci pa vieličyni vytvorca ŭ APIEK. Jaho zdabyča składaje kala 3,3 miljona baralaŭ nafty ŭ sutki, a razam z kandensatam i inšymi vadkaściami — kala 4,6 miljona baralaŭ. Heta prykładna 4,5 % suśvietnaj prapanovy nafty.

Ekśpierty adznačajuć, što ataka na saudaŭski zavod Ras Tanura aznačaje surjoznuju eskałacyju kanfliktu, bo enierhietyčnaja infrastruktura krain Piersidskaha zaliva faktyčna apynułasia pad pahrozaj. Na ich dumku, heta moža padšturchnuć Saudaŭskuju Araviju i inšyja dziaržavy rehijonu da bolš aktyŭnaha ŭdziełu ŭ vajennych dziejańniach suprać Irana.

Pavodle saudaŭskich uładaŭ, situacyja na Ras Tanura znachodzicca pad kantrolem: dva bieśpiłotniki byli pierachoplenyja, ich abłomki vyklikali niaznačnaje ŭzharańnie, paciarpiełych niama. Pastaŭki nafty na ŭnutrany rynak pakul nie parušanyja. Adnak u cełym situacyja ŭzmacniła zaniepakojenaść adnosna suśvietnych pastavak, bo marskija pieravozki praz Armuzski praliŭ amal spynilisia paśla napadaŭ na sudny.

Na fonie hetych padziej košt nafty marki Brent vyras prykładna na 10% i pieravysiŭ 82 dalary za baral.

Kamientary da artykuła