Novarasijsk atakavany dronami — u horadzie vybuchi i pałajučaja naftabaza. Raniej ZŠA prasili Ukrainu tudy nie bić
Unočy 2 sakavika rasijski partovy horad Novarasijsk, jaki važny bazavańniem Čarnamorskaha fłotu Rasii i infrastrukturaj dla pierakidvańnia nafty, znachodziŭsia pad masiravanym udaram dronaŭ. Pra heta paviedamiła ŭłada horada i rehijona.
Pakazalna, što na minułym tydni ambasadarka Ukrainy ŭ ZŠA zajaviła, što ŭvosień, kali Ukraina atakavała naftavuju infrastrukturu Novarasijska, to ZŠA zaścierahali Kijeŭ takoha nie rabić, bo heta škodzić biznes-intaresam amierykanskich kampanij, jakija praz hety horad ekspartujuć zdabytuju ŭ Kazachstanie naftu, piša BBC News Ukraina.
Usiu noč u sacyjalnych sietkach źjaŭlalisia kadry prylotaŭ pa naftavych abjektach Novarasijska i vielizarnych vybuchaŭ. Rasijskaja ŭłada paviedamlaje pra paškodžańnie mnohich damoŭ, a rasijskija ŚMI paviedamlajuć pra paškodžańnie vialikaha naftavaha terminała.
Ukrainski bok hetuju situacyju pakul što nie kamientavaŭ.
«Usiu noč našy vajskoŭcy adbivali masavanuju ataku ŭkrainskich bieśpiłotnikaŭ. Najmacniejšy ŭdar atrymaŭ Novarasijsk, tam uviali režym nadzvyčajnaj situacyi», — havorycca ŭ zajavie ŭłady Krasnadarskaha kraju.
Pavodle źviestak, paškodžany 8 šmatkvaternych i 9 pryvatnych damoŭ, a taksama dziciačy sadok. Ranieńni atrymali piać čałaviek.
Kiraŭnik Novarasijska Andrej Kraŭčanka śćviardžaje, što hetyja paškodžańni — ad askiepkaŭ źbitych dronaŭ.
Vydańnie Astra praanalizavała apublikavanyja videa i vykazała zdahadku, što zahareŭsia naftavy terminał «Šescharys», ale aficyjnaha paćviardžeńnia hetaj infarmacyi niama.
Adnak mer Novarasijska zranku pryznaŭ, što ruch u rajonie hetaha terminała pierakryvali, a adkryli tolki paśla 6‑j hadziny ranicy.
Naftanaliŭny terminał «Šescharys» — heta vialiki marski kompleks dla pryjomu, zachoŭvańnia i adhruzki nafty i naftapraduktaŭ na tankiery. Heta adzin z najbujniejšych i stratehična važnych naftavych terminałaŭ Rasii.
Terminał užo byŭ paškodžany ŭ vyniku ataki USU ŭ listapadzie 2025 hoda.
«Terminał «Šescharys» — adzin z najbujniejšych naftanaliŭnych kompleksaŭ pieraładavańnia nafty i naftapraduktaŭ na poŭdni RF. Jon vykarystoŭvajecca ŭ zabieśpiačeńni hrupovak uzbrojenych sił dziaržavy-ahresarki, jakija viaduć bajavyja dziejańni va Ukrainie», — adznačaŭ letaś Hienštab USU i adspravazdačyŭsia pra ŭdar.
Nie bić pa Novarasijsku?
24 lutaha stała viadoma, što paśla paśpiachovaj vosieńskaj ataki dronaŭ USU pa partovaj i naftavaj infrastruktury ŭ rasijskim Novarasijsku Ukraina atrymała sihnał ad Złučanych Štataŭ, jakija zaścierahli «ŭtrymacca ad atak na intaresy ZŠA». Heta nibyta zakranuła inviestycyi ZŠA ŭ Kazachstanie, jaki pastaŭlaŭ naftu praz Novarasijsk.
Pra niezadavolenaść ZŠA ŭdarami Ukrainy 24 lutaha 2026 hoda paviedamiła ambasadarka Ukrainy Volha Stefanišyna, jakuju cytavała Foreign Policy.
Pavodle słoŭ inšaha ŭkrainskaha čynoŭnika, słovy jakoha na ŭmovach ananimnaści pryvodzić FP, havorka išła nie pra farmalny demarš, a pra telefonnuju razmovu nakont ataki.
Ukrainskija ekśpierty tady źviarnuli ŭvahu, što Rasija pastajanna bje pa amierykanskich zavodach va Ukrainie, u pryvatnaści źniščyli bujnyja vytvorčaści ŭ Mukačavie i Traściancy.
U listapadzie 2025 hoda ŭkrainskija vajskoŭcy nanieśli ŭdar pa infrastruktury Kaśpijskaha trubapravodnaha kansorcyuma ŭ akvatoryi marskoha porta Novarasijska.
Pa hetym trubapravodzie nafta z Kazachstana pastupaje ŭ Rasiju i dalej idzie na ekspart praz marski terminał KTK.
Kazachstan tady vykazaŭ pratest, adnačasova aktyvizavaŭšy płan pa pieranakiravańni nafty na alternatyŭnyja maršruty.
30 listapada 2025 hoda Ministerstva zamiežnych spraŭ Kazachstana vykazała pratest praz ataku na infrastrukturu Kaśpijskaha trubapravodnaha kansorcyuma ŭ akvatoryi marskoha porta Novarasijska.
Ukraina ŭ adkaz tady zajaviła: «Nijakija dziejańni ŭkrainskaha boku nie skiravanyja suprać Respubliki Kazachstan ci inšych trecich bakoŭ — usie namahańni Ukrainy nakiravanyja na adpor poŭnamaštabnaj rasijskaj ahresii ŭ miežach realizacyi harantavanaha 51 artykułam Statuta AAN prava na samaabaronu. U miežach vyvieranych i stratehična abhruntavanych abaronnych apieracyj Siły abarony Ukrainy sistemna asłablajuć vajskova-pramysłovy patencyjał ahresara i pazbaŭlajuć jaho srodkaŭ dla viadzieńnia złačynnaj zachopnickaj vajny i zabojstva našych ludziej — Ukraina bje ŭ adkaz na ŭdary i ataki ahresara».
Ciapier čytajuć
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny24
Kamientary