U AAE, Katary i Amanie zastajucca bolš za try tysiačy biełaruskich turystaŭ

Bolš za try tysiačy arhanizavanych turystaŭ ź Biełarusi zastajucca ciapier u krainach Blizkaha Uschodu, dzie nazirajecca niestabilnaja situacyja, paviedamiŭ dyrektar Nacyjanalnaha ahienctva turyzmy Kirył Mašarski ŭ efiry telekanała «Pieršy infarmacyjny».

Čorny słup dymu padymajecca 1 sakavika nad składam u pramysłovaj zonie horada Šardža ŭ Abjadnanych Arabskich Emiratach paśla paviedamleńniaŭ pra iranskija ŭdary pa Dubai. Fota: AP Photo/Altaf Qadri

Pavodle źviestak Nacyjanalnaha ahienctva turyzmu, u Abjadnanych Arabskich Emiratach znachodzicca zvyš 2,5 tysiačy biełarusaŭ, u Amanie — 319 čałaviek, u Katary — kala 200.

Paviedamlajecca, što dla suviazi z hramadzianami arhanizavanyja haračyja linii. Časovy pavierany ŭ spravach Biełarusi ŭ Katary ŭžo sustreŭsia z turystami ŭ Dosie: pavodle jaho infarmacyi, ludzi zachoŭvajuć spakoj i čakajuć raźvićcia situacyi.

Razhladajecca mahčymaść evakuacyi biełarusaŭ praz Saudaŭskuju Araviju, siarod inšaha praz Er-Ryjad. Turystyčnym kampanijam i dypłamatam daručana sadziejničać padaŭžeńniu biaspłatnaha žyćcia ŭ hatelach na pieryjad vymušanaha čakańnia.

Tym, chto pavinien byŭ vylatać u Emiraty, Katar abo Aman u najbližejšyja dni, turapieratary abaviazanyja viarnuć poŭny košt turaŭ.

Pradstaŭniki turystyčnaj śfiery rekamiendujuć hramadzianam zastavacca ŭ hatelach abo arandavanym žylli, nie pakidać ich biez krajniaj nieabchodnaści, a taksama paźbiahać rajonaŭ ź dziaržaŭnymi ŭstanovami i vajskovymi abjektami.

28 lutaha ZŠA i Izrail pačali vajskovuju apieracyju suprać Irana. Jany nanieśli ŭdary pa bujnych haradach, u tym liku pa stalicy — Tehieranie. U adkaz Iran ažyćciaviŭ rakietnyja ŭdary, u tym liku pa vajskovych bazach ZŠA ŭ šerahu krain rehijona. Kanflikt zakranuŭ značnuju častku Blizkaha Uschodu.

Kamientary da artykuła