Pobač z Kolem Łukašenkam časta možna bačyć adnaho i taho ž achoŭnika. Chto jon taki?

Alaksandra Łukašenku padčas publičnych vystupaŭ zaŭsiody supravadžaje šmatlikaja achova. A ŭ jaho małodšaha syna Mikałaja, vidać, jość ułasny ciełaachoŭnik, jaki čaściej za inšych źjaŭlajecca na publicy pobač z im. Vydańnie «Lusterka» vyśvietliła, chto jon.

Arciom Sabiaščanski staić za śpinaj Mikałaja Łukašenki padčas intervju. Minsk, 5 studzienia 2025 hoda. Skrynšot: NEWS.BY: naviny Biełarusi i śvietu, YouTube

Arciomu Sabiaščanskamu 31 hod. Jon uradženiec horada Ciemirtau ŭ Kazachstanie, jak vynikaje sa źviestak aficyjnych rejestraŭ, pieradadzienych «Lusterku» abjadnańniem Belpol.

U Biełarusi jon vučyŭsia ŭ škole Baranavickaha rajona, potym skončyŭ fakultet miechanizacyi sielskaj haspadarki ŭ Biełaruskaj dziaržaŭnaj sielskahaspadarčaj akademii, havaryłasia na jaho staroncy ŭ VK.

Arciom Sabiaščanski. Fota ź jaho staronki ŭ VK

Sabiaščanski pamianiaŭ niekalki miescaŭ pracy, nie źviazanych z achovaj: pracavaŭ na ptuškafabrycy «Družba», na ahrakambinacie «Mir», u internet-kramie «Jeŭraopt». U 2019 hodzie jon pastupiŭ na słužbu ŭ vajskovuju čaść 3214 — heta śpiecnaz unutranych vojsk MUS. A ŭ 2021 hodzie pierajšoŭ u čaść 01549, jakaja adnosicca da Słužby biaśpieki Łukašenki-starejšaha.

Na fota pobač ź Mikałajem Łukašenkam Sabiaščanskaha možna bačyć pačynajučy jak minimum sa studzienia 2025 hoda. Mienavita jon cieniem išoŭ za Mikałajem padčas «Marafonu adzinstva» — sieryi kancertaŭ i inšych mierapryjemstvaŭ u padtrymku Alaksandra Łukašenki i palityki, jakuju jon pravodzić, pierad prezidenckimi vybarami 2025 hoda. Mikałaj vystupaŭ tam z muzyčnym numaram na rajali i niekalki razoŭ davaŭ intervju dziaržkanałam.

Arciom Sabiaščanski supravadžaje Mikałaja Łukašenku padčas intervju. Minsk, 24 studzienia 2025 hoda. Skrynšot: Vriemia piervoho, Telegram

Sabiaščanski taksama trapiŭ na amatarskaje videa, na jakim jon pravodzić Mikałaja da aŭtamabila. Miarkujučy z detalaŭ, kadry byli źniatyja paśla parada ŭ honar Dnia Pieramohi ŭ 2025 hodzie.

Arciom Sabiaščanski supravadžaje Mikałaja Łukašenku. Minsk, jak miarkujecca, travień 2025 hoda. Skrynšoty: presidentsbp, Instagram

U lipieni 2025 hoda padčas śviata Kupalle ŭ Aleksandryi Sabiaščanski siadzieŭ u hladzielnaj zale za śpinami Alaksandra i Mikałaja Łukašenkaŭ.

Arciom Sabiaščanski siadzić za śpinami Mikałaja i Alaksandra Łukašenki na śviacie Kupalle. Aleksandryja, Škłoŭski rajon, 5 lipienia 2025 hoda. Fota: pres-słužba palityka

Za apošni hod Mikałaj razam z baćkam pabyvaŭ u niekalkich zamiežnych pajezdkach: naprykład, u červieni supravadžaŭ jaho padčas vizitu ŭ Kitaj, u vieraśni prysutničaŭ na samicie ŠAS i sustrečy z pradstaŭnikom Kampartyi, a ŭ śniežni zaśviaciŭsia ŭ «turne» palityka pa krainach Poŭdnia. Praŭda, Arcioma Sabiaščanskaha na kadrach z hetych pajezdak nie było vidać, u aficyjnaj chronicy milhali «asnoŭnyja» ciełaachoŭniki Łukašenki-starejšaha Andrej Parchimovič i Dźmitryj Hierasimčyk.

Darečy, na niekatorych videa z udziełam palityka i samoha Mikałaja časam možna pryniać za achoŭnika. Padčas publičnych vystupleńniaŭ baćki jon časta staić za jaho śpinaj, uvažliva ahladajecca, a časam i ruchajecca sinchronna ź ciełaachoŭnikami.

Mikałaj Łukašenka i nieapaznany ciełaachoŭnik supravadžajuć Alaksandra Łukašenku ŭ natoŭpie. Aleksandryja, Škłoŭski rajon, lipień 2024 hoda. Skrynšot: infarmacyjnaje ahienctva BIEŁTA, YouTube

U červieni 2024 hoda padčas vizitu biełaruskaj delehacyi ŭ Manholiju Mikałaj trapiŭ na fota ŭ majcy z łahatypam Słužby biaśpieki.

Sprava — Mikałaj Łukašenka ŭ majcy z łahatypam Słužby biaśpieki palityka. Fota: Puł piervoho, Telegram

Aficyjna Mikałaj Łukašenka ciapier student. U 2022 hodzie jon pastupiŭ na bijafak BDU. Da pačatku navučańnia samaha viadomaha abituryjenta na fakultecie zrabili ramont, a taksama tut źjaviłasia achova.

U červieni 2023‑ha Alaksandr Łukašenka zajaviŭ, što jaho małodšy syn prachodzić navučańnie ŭ Piekinskim univiersitecie ŭ ramkach prajekta supracoŭnictva Biełarusi i Kitaja. Sakratar partyjnaha kamiteta kitajskaj VNU Chaa Pin raskazvaŭ u intervju biełaruskamu dziaržTB, što Łukašenka-małodšy «vielmi dobra vučycca, jon najlepšy student na kursie».

Pačynajučy ź pieršaha hoda navučańnia Mikałaj atrymlivaje stypiendyju z łukašenkaŭskaha śpiecfondu pa padtrymcy talenavitaj moładzi — miarkujučy z usiaho, za vydatnyja vyniki.

Kamientary da artykuła