U ZŠA abmiarkoŭvajuć mahčymaść adpravić u Iran śpiecnaz dla ŭziaćcia pad kantrol uzbahačanaha ŭranu
Pavodle infarmacyi vydańnia Axios sa spasyłkaj na krynicy, ZŠA i Izrail abmiarkoŭvali mahčymaść nakiravańnia padraździaleńniaŭ śpiecyjalnaha pryznačeńnia ŭ Iran, kab uziać pad kantrol i harantavać biaśpieku zapasaŭ vysokaŭzbahačanaha ŭranu.
Varonki ad udaraŭ VPS ZŠA pa jadziernym abjekcie ŭ iranskim Fardo ŭ červieni 2025 hoda. Fota: Maxar
Miarkujecca, što takaja apieracyja moža adbycca na bolš poźnim etapie vajny — paśla taho, jak abiedźvie krainy pierakanajucca, što iranskija vajskoŭcy ŭžo nie ŭjaŭlajuć surjoznaj pahrozy.
Paśla ŭdaraŭ ZŠA i Izraila pa iranskich jadziernych abjektach u červieni 2025 hoda zapasy ŭranu apynulisia pad zavałami. Amierykanskija i izrailskija pradstaŭniki śćviardžajuć, što sam Iran z taho času nie moža da ich dabracca. Pavodle ich źviestak, asnoŭnaja častka jadziernaha paliva znachodzicca ŭ padziemnych tunelach na adnym z abjektaŭ u horadzie Isfachan, a astatnija zapasy raźmieščany ŭ bunkierach u Fardo i Natanzie.
Razam z tym, jak piša The New York Times sa spasyłkaj na krynicy, znajomyja z raźviedvalnaj infarmacyjaj, Iran usio ž moža atrymać dostup da zapasaŭ uzbahačanaha ŭranu ŭ Isfachanie praz vuzki tunel.
Akramia taho, pavodle Axios, Złučanyja Štaty taksama abmiarkoŭvali mahčymaść zachopu stratehična važnaha iranskaha vostrava Chark, praź jaki prachodzić kala 90 pracentaŭ ekspartu syroj nafty krainy.
Čytajcie taksama:
Pieršy tydzień vajny ŭ Iranie kaštavaŭ amierykanskamu biudžetu 6 miljardaŭ dalaraŭ
Apakalipsis u Tehieranie: paśla ŭdaraŭ pa naftabazach na horad vypaŭ kisłotny doždž
ZŠA i Izrail atakavali schovišča nafty ŭ Tehieranie. Uźnik mocny pažar
Tramp abvinavaciŭ Tehieran va ŭdary pa iranskaj škole dla dziaŭčynak