Chto tyja dziaŭčaty, jakija «vypadkova» apynulisia ŭ Mak.by padčas vizitu Łukašenki?

8 sakavika padčas naviedvańnia Alaksandram Łukašenkam restarana Mak.by internet-karystalniki źviarnuli ŭvahu na pryadzietych dziaŭčat, jakija siadzieli za jaho śpinaj i jeli, ale pry hetym nie byli padobnyja da zvyčajnych naviedvalnic. Vydańnie «Lusterka» daviedałasia, chto jany.

Karystalniki TikTok źviarnuli ŭvahu na dźviuch maładych dziaŭčat, jakija trapili na zadni płan videa pres-słužby Łukašenki. Fota: pres-słužba Łukašenki / sport5.by

U restaracyju z Łukašenkam pryjšła davoli vialikaja kampanija: sam palityk, niekalki jaho achoŭnikaŭ, namieśnik premjer-ministra Mikałaj Snapkoŭ, jaki sprabavaŭ za jaho zapłacić. Za adnym stałom z Łukašenkam siadzieli žurnalisty praŭładnych ŚMI, u tym liku Iłona Krasuckaja z telekanała «Biełaruś 1» i Ihar Tur z ANT.

Na kadrach aficyjnaj chroniki možna taksama bačyć staršyniu Minharvykankama Uładzimira Kucharava, biznesoŭca Siarhieja Ciacieryna, jakoha źviazvaje ščylnaje siabroŭstva z Łukašenkam, asabistuju doktarku palityka Śviatłanu Kanašenku i špica Umku, jaki ŭžo nie ŭpieršyniu lažaŭ na stale.

Łukašenka naviedvaje restaracyju Mak.by. Za stolikam źleva siadziać Śviatłana Kanašenka, Uładzimir Kucharaŭ, Siarhiej Ciacieryn i Mikałaj Snapkoŭ, na stale lažyć špic Umka. Minsk, 8 sakavika 2026 hoda. Fota: pres-słužba Alaksandra Łukašenki

Adnak karystalniki TikTok źviarnuli ŭvahu na dźviuch maładych dziaŭčat, jakija trapili na zadni płan videa pres-słužby Łukašenki. Jany sprabavali pavodzić siabie jak zvyčajnyja naviedvalnicy restarana, u niejki momant pačali jeści. Pry hetym abiedźvie čas ad času pazirali ŭ kamiery.

Na inšych kadrach možna zaŭvažyć, što za śpinaj palityka za stolikami siadziać tolki prycharošanyja dziaŭčaty.

Kadry aficyjnaj chroniki, na jakich možna bačyć dziaŭčat, jakija siadziać za śpinaj Łukašenki padčas vizitu ŭ restaran Mak.by. Minsk, 8 sakavika 2026 hoda. Fota: pres-słužba palityka

«Dziaŭčaty na zadnim fonie jak u restaracyi», — adznačyŭ adzin z karystalnikaŭ.

«Nastupnym razam papiaredźcie aktorak u kamiery nie hladzieć», — pažartavaŭ inšy

«Cikava, jak prachodziŭ kastynh na rolu naviednic», — pacikaviŭsia treci.

Kadry aficyjnaj chroniki, na jakich možna bačyć dziaŭčat, jakija siadziać za śpinaj Łukašenki padčas vizitu ŭ restaracyju Mak.by. Minsk, 8 sakavika 2026 hoda. Fota: pres-słužba palityka

«Lusterka» vyśvietliła, što za dziaŭčaty apynulisia ŭ restaranie padčas vizitu Łukašenki. Jany abiedźvie — byłyja ŭdzielnicy konkursaŭ pryhažości i, vidavočna, supracoŭnicy słužby pratakoła pry palityku.

Naviedvalnica źleva — Anastasija Niekraševič. Dziaŭčyna rodam z Homiela, ciapier joj 21 hod. Anastasija — pijanistka, atrymlivała ŭznaharody na roznych tvorčych konkursach i premiju śpiecfondu Łukašenki ŭ padtrymcy talenavitaj moładzi. U 2023 hodzie dziaŭčyna pastupiła ŭ Biełaruskuju dziaržaŭnuju akademiju muzyki na fartepijanny i kampazitarska-muzykaznaŭčy fakultet.

Anastasija Niekraševič. Fota: kultura-info.by

Taksama Anastasija ŭdzielničaje ŭ roznych konkursach pryhažości. U kancy 2023 hoda jaje pryznali «Mis Akademijaj muzyki», paśla na konkursie «Karaleva Studenctva» joj dastałasia karona pieršaj vice-mis. U 2025 hodzie studentka ŭziała ŭdzieł u konkursie «Mis Minsk» i vyjhrała tytuł «Mis sport».

Anastasija Niekraševič atrymlivaje ŭznaharodu konkursu pryhažości «Mis Minsk — 2025». Fota: sport5.by

A jašče Anastasija, vidavočna, pracuje ŭ słužbie pratakoła pry Łukašenku i sustrakaje haściej na aficyjnych mierapryjemstvach. Studentku ŭ nacyjanalnym kaściumie možna bačyć na kadrach z sustrečy prezidenta Uźbiekistana Šaŭkata Mirzijojeva i vizitu prezidenta Kazachstana Kasyma-Žamarta Takajeva ŭ Minsk u červieni 2025 hoda.

Anastasija Niekraševič (sprava) udzielničaje ŭ sustrečy aficyjnaj delehacyi z Uźbiekistana. Aeraport Minsk, červień 2025 hoda. Fota: BiełTA

Druhaja «vypadkovaja» naviedvalnica Mak.by — Lizavieta Kazak. Joj 20 hadoŭ, jana studentka fakulteta mižnarodnych ekanamičnych adnosin BDEU. U minułym jana pryśviaciła 12 hadoŭ balna-spartovym tancam, a paźniej zachapiłasia čyrlidzinham. Lubić čytać kłasičnuju litaraturu.

Lizavieta Kazak. Fota: BiełTA

Lizavieta ŭdzielničała ŭ konkursie «Mis BDEU», a taksama dajšła da finału «Mis Biełaruś» u 2023 hodzie, adnak zastałasia biez karony.

Studentka brała ŭdzieł u sustrečy Łukašenki z moładzievym aktyvam i navat zadała jamu pytańnie. Tady jaje cikaviła, «ci ŭsim zadavoleny kiraŭnik dziaržavy ŭ Pałacy Niezaležnaści i ci jość u jaho lubimaja zała».

Lizavieta Kazak zadaje pytańnie padčas sustrečy z Alaksandram Łukašenkam. Minsk, kastryčnik 2023 hoda. Fota: brsm.by

Ciapier Lizavieta pradstaŭlajecca ŭ Instagram jak madel. Imavierna, jana taksama pracuje ŭ słužbie pratakoła pry Łukašenku. Jaje možna bačyć z karavajem na kadrach uručeńnia dziaržaŭnych uznaharod pieradavikam ahrapramysłovaha kompleksu ŭ listapadzie 2025 hoda.

Lizavieta Kazak niasie karavaj padčas uručeńnia ŭznaharod zasłužanym ahraryjam Biełarusi. Minsk, listapad 2025. Fota: BiełTA

Inšyja «zvyčajnyja» ludzi padčas vizitu Łukašenki ŭ restaranie taksama byli. Da taho jak pačać jeści, palityk padyšoŭ da kampanii z pytańniem: «Heta narod, jaki haładaje?» Jon pasprabavaŭ vyśvietlić, ci sami jany pryjšli, ale nie atrymaŭ vyraznaha adkazu.

Naviedvalniki restarana Mak.by. Minsk, 8 sakavika 2026 hoda. Fota: pres-słužba Alaksandra Łukašenki

Ludziej za hetym stolikam sapraŭdy nielha nazvać publičnymi, padobna, što jany i nie siłaviki. Cikava, što čałaviek z takim samym imiem, jak u adnaho z tych, što siadziać za stolikam, pracuje ŭ dziaržaŭnym abjadnańni «Staličny handal i pasłuhi». Vidać, kampanija, jakaja zazirnuła ŭ restaran, taksama pa pracy.

Kamientary da artykuła