«Što, iznoŭ nie apłačana?» Pierad Łukašenkam u Mak.baj chvalilisia cuda-aparatam, jaki pry im admoviŭsia pracavać
Dziaržaŭnyja ŚMI źniali padrabiazny siužet, jak Łukašenku vadzili pa restaracyi Mak.baj i pakazvali, jak u joj usio cudoŭna arhanizavana. Ale ŭ adnym miescy zdaryŭsia kanfuz.
U pačatku ekskursii Łukašenka zajaviŭ, što jon, maŭlaŭ, nie tolki ni razu nie byŭ u Makdonaldsie, jaki ciapier pieratvaryŭsia ŭ Mak.baj, ale za ŭsio svajo 71‑hadovaje žyćcio nibyta tolki nie bolš za try razy byŭ i ŭ zvyčajnych restaranach, uklučajučy savieckija.
Mabyć, mienavita z uvahi na nieafictva Łukašenki jamu padrabiazna tłumačyli mnohija elemientarnyja rečy, dobra znajomyja i zrazumiełyja bolšaści naviedvalnikaŭ ustanoŭ. Siarod inšaha dyrektarka sietki «Mak.baj» Viktoryja Dańko razam ź pieršym vice-premjeram Mikałajem Snapkovym niemałuju častku siužetu prezientavali jamu aparat samaabsłuhoŭvańnia, praz ekran jakoha karystalnik sam farmuje zakaz i jaho apłačvaje (jak akreśliŭ Łukašenka: «tycnuŭ palcam — zapłaciŭ»).
Usio było dobra, pakul nie dajšła sprava da apłaty. Choć zakaz paśpiachova sfarmavali, kartkaj Snapkova raźličycca nie ŭdałosia — sistema dva razy vydała pamyłku. Urešcie ad aparata tak i adyšli, nie dabiŭšysia ad jaho tołku.
Pry hetym akurat u toj čas, jak aparat dumaŭ, Snapkoŭ vyrašyŭ pierad Łukašenkam pachvalicca, što nibyta samaj składanaj zadačaj było stvaryć adpaviednaje prahramnaje zabieśpiačeńnie, i zamiest amierykanskaha miascovyja śpiecyjalisty zrabili svajo. Łukašenka ŭžo navat vynies padziaku: «Voś za heta małajcy!», a adkazny za hetu spravu, uściešany, staŭ paviedamlać jamu, što mienavita jany zdoleli zrabić.
Akurat tut i zdaryŭsia kanfuz, što apłata druhi raz nie prajšła, i Łukašenka, jaki jakraz hladzieŭ na ekran, heta zaŭvažyŭ. Praŭda, davać nahaniaju pryludna nie staŭ, i ŭsiu situacyju pieraviali ŭ žart, pajšoŭšy dalej. Snapkoŭ tolki ŭžo pa darozie sprabavaŭ dahavaryć: «Heta, kaniešnie, byŭ podźvih. Heta kruta. Soft uvieś naš».
Ciapier čytajuć
Staruju kamianicu kala ratušy ŭ Mahilovie rychtavali dla haradskoha muzieja. Ciapier tam robiać ofis rasijskaha pasolstva na čale z byłym ministram «ŁNR»1313
Kamientary