Pucin prapanavaŭ Jeŭropie znoŭ kuplać u jaho naftu i haz

Prezident Rasii Uładzimir Pucin zajaviŭ, što Rasija hatovaja adnavić pastaŭki nafty i hazu ŭ Jeŭropu na fonie enierhietyčnaha kryzisu, jaki ŭźnik praz kanflikt vakoł Irana. Pra heta jon skazaŭ padčas narady ŭ Kramli, pryśviečanaj situacyi na suśvietnym rynku nafty i hazu, piša The Moscow Times.

Uładzimir Pucin. Fota: Sefa Karacan/Anadolu via Getty Images

Pucin padkreśliŭ, što Rasija nikoli sama nie admaŭlałasia pastaŭlać enierharesursy ŭ Jeŭropu. Pavodle jaho słoŭ, kali jeŭrapiejskija kampanii i pakupniki vyrašać znoŭ supracoŭničać i zabiaśpiečać doŭhaterminovuju i stabilnuju pracu biez palityčnaha cisku, rasijski bok hatovy adnavić takoje supracoŭnictva.

Jon taksama adznačyŭ, što Rasija praciahvaje pastaŭlać enierharesursy ŭ Vienhryju i Słavakiju — krainy Jeŭrasajuza, jakija i ciapier kuplajuć rasijskija naftu i haz. Akramia taho, ekspart pavialičvajecca ŭ inšyja dziaržavy, jakija Maskva ličyć nadziejnymi partniorami.

Na dumku Pucina, vajna ŭ Iranie i błakavańnie Armuzskaha praliva, praź jaki prachodzić kala traciny suśvietnaha handlu naftaj, moža surjozna paŭpłyvać na suśvietnuju ekanomiku. Jon miarkuje, što heta pryviadzie da rostu inflacyi, prablem u vytvorčaści tavaraŭ i novaha ŭzroŭniu cen na enierharesursy, bo chutka zamianić naftu i haz ź Blizkaha Uschodu amal niemahčyma. Taksama jon papiaredziŭ, što zdabyča nafty ŭ rehijonie, źviazanaja z hetym pralivam, moža spynicca ŭžo najbližejšym miesiacam.

Palityk padkreśliŭ, što rasijskija enierhietyčnyja kampanii zaŭsiody ličylisia nadziejnymi pastaŭščykami. Jon dadaŭ, što vysokija suśvietnyja ceny nafty, jakija niadaŭna dasiahali kala 119 dalaraŭ za baral, varta vykarystoŭvać dla źnižeńnia daŭhoŭ enierhietyčnych kampanij pierad rasijskimi bankami.

Kamientary da artykuła