ZŠA zapatrabavali ad PAR vyjści z BRIKS

Administracyja ZŠA patrabuje ad Paŭdniova-Afrykanskaj Respubliki vyjści arhanizacyi BRIKS, piša The Moscow Times. Pra heta zajaviŭ amierykanski pasoł u PAR Lea Brent Bozeł, spasyłajučysia na prezidenta Donalda Trampa, jaki nibyta skazaŭ: «Ja chaču, kab PAR znoŭ była niedałučanaj krainaj. Niedałučeńnie — nie takaja ŭžo vialikaja prośba».

Prezident ZŠA Donald Tramp z prezidentam PAR Siryłam Ramafosam 21 maja 2025 hoda ŭ Biełym domie. Jon demanstruje staronki z artykuła pra represii suprać biełych fiermieraŭ u PAR. Fota: Chip Somodevilla/Getty Images

Pa słovach Bozeła, Vašynhton paviedamiŭ pra heta ŭradu PAR amal hod tamu, ale adkazu tak i nie atrymaŭ. Pasoł adznačyŭ, što ŭsio bolšaje supracoŭnictva PAR z krainami, jakija ZŠA ličać praciŭnikami, vyklikaje zaniepakojenaść i ŭpłyvaje na davier inviestaraŭ.

Akramia vychadu z BRIKS, ZŠA patrabujuć pierahledzieć zakon ab eksprapryjacyi i prahramu Black Economic Empowerment, asudzić łozunh «Zabi bura», abaranić biełych fiermieraŭ i admovicca ad pazovu da Izraila ŭ Mižnarodnym sudzie AAN pa pytańni «hienacydu» paleścincaŭ.

PAR dałučyłasia da BRIKS u 2011 hodzie i ciapier uvachodzić u arhanizacyju razam z Rasijaj, Kitajem, Brazilijaj, Indyjaj, Jehiptam, Iranam, AAE, Efiopijaj i Indaniezijaj. Pry hetym urad PAR imkniecca zachavać dostup da amierykanskaha rynku ŭ ramkach AGOA, što daje bieśpieraškodny dostup dla tysiač afrykanskich tavaraŭ.

Raniej Tramp pahražaŭ, što chutka skončyć z BRIKS, kali krainy błoka pasprabujuć stvaryć surjoznaje abjadnańnie abo ŭvieści valutu zamiest dalara, i navat abiacaŭ uvieści pošliny na 100% na ich pradukcyju.

Kamientary da artykuła