Tramp pravioŭ skandalnuju sustreču z prezidentam PAR. Jana nahadvała pryjom u Biełym domie Zialenskaha

Spačatku sustreča prachodziła ŭ pryjaznaj atmaśfiery — dva prezidenty abmiarkoŭvali holf, a Ramafosa navat padaryŭ Trampu vialikuju knihu pra pali dla holfu ŭ PAR. Taksama jon padziakavaŭ ZŠA za dapamohu padčas pandemii karanavirusu.

Adnak chutka ton sustrečy źmianiŭsia. Da razmovy dałučyŭsia Iłan Mask, daradca Trampa i ŭradženiec PAR. Hałoŭnaj jaje temaj paśla taho staŭ nibyta pieraśled biełaha nasielnictva ŭ Paŭdniovaj Afrycy. Tramp pakazaŭ videa i fota, jakija, pavodle jaho słoŭ, śviedčać pra hvałt i zabojstvy biełych fiermieraŭ. Jon nazvaŭ ubačanaje «žachlivym» i vykazaŭ zaniepakojenaść situacyjaj.

Sustreča adbyłasia na fonie napružanych adnosin pamiž ZŠA i PAR. Amierykanski bok niadaŭna daŭ status uciekačoŭ 59 biełym hramadzianam PAR, što vyklikała krytyku z boku hetaj krainy.

Ułady PAR kateharyčna admaŭlajuć usie abvinavačańni ŭ hienacydzie. Nivodzin sud ci palityčnaja siła ŭ PAR nie paćvierdzili padobnyja śćviardžeńni. Sam Ramafosa zajaviŭ, što ŭ krainie niama ni hienacydu, ni palityki nianaviści ci pomsty.

Ramafosa pryjechaŭ u Vašynhton z metaj adnavić dobryja adnosiny i zaklučyć vyhadnyja handlovyja pahadnieńni. Adnak jamu daviałosia sutyknucca z žorstkaj i niečakanaj pazicyjaj amierykanskaha lidara, što stała sapraŭdnym vyprabavańniem dla paŭdniovaafrykanskaha prezidenta.

Tramp taksama vykazaŭ niezadavalnieńnie z nahody zakona ab eksprapryjacyi, pryniataha ŭ PAR, jaki dazvalaje ŭładam zabirać niavykarystanuju ziamlu biez kampiensacyi, kali jość hramadskaja nieabchodnaść. Ramafosa tłumačyŭ, što zakon nakiravany na spraviadlivaje pieraraźmierkavańnie ziamli, i nichto nie stračvaje jaje biez pryčyny.

Zhadali padčas hetaj razmovy i ŭkrainskaje pytańnie, pamiž Trampam i Ramafosam adbyŭsia taki dyjałoh:

Ramafosa: My chacieli b bačyć kaniec hetaj vajny, viadoma. My całkam padtrymlivajem vas.

Tramp: Ja patelefanavaŭ Zialenskamu, a mnie skazali: «Jon u Paŭdniovaj Afrycy». Ja spytaŭ: «Što jon, čort biary, robić u Paŭdniovaj Afrycy?»

Ramafosa: Jon razmaŭlaŭ sa mnoj.

Tramp (śmiajecca): Što jon, čort biary, robić u Paŭdniovaj Afrycy?

Ramafosa (śmiajecca): Pryjšoŭ čas dla miru.

Prezident PAR taksama raskazaŭ Trampu, što nibyta ŭhavorvaŭ prezidenta Ukrainy pajści na pieramovy z rasijanami bieź jakich-niebudź papiarednich umoŭ.

Padčas hetaj sustrečy Tramp taksama žorstka abyšoŭsia z reparcioram telekanała NBC, jaki zadaŭ jamu pytańnie pra raskošny samalot, niadaŭna padorany prezidentu ZŠA uładami Katara.

Tramp zajaviŭ, što samalot pieradadzieny na bałans amierykanskich Uzbrojenych sił. Jon abvinavaciŭ telekanał u raspaŭsiudzie fejkaŭ, nazvaŭ žurnalista «niedastatkova razumnym žachlivym reparcioram» i prapanavaŭ jamu «pravalvać».

• 11
• 0
• 6
• 52
• 1
• 2
• 1
• 1