Tramp rezka źniziŭ kolkaść uciekačoŭ, jakich prymuć ZŠA. Pryjarytet addaduć biełym paŭdniovaafrykancam

Pryčyna skaračeńnia kolkaści ŭciekačoŭ aficyjna nie ŭkazana, ale ŭ paviedamleńni havorycca, što heta miera apraŭdanaja humanitarnymi mierkavańniami abo adpaviadaje nacyjanalnym intaresam.

20 studzienia, u svoj pieršy ž dzień na pasadzie prezidenta, Tramp padpisaŭ ukaz ab prypynieńni prahramy pryjomu ŭciekačoŭ u ZŠA (USRAP), zajaviŭšy, što heta dazvolić amierykanskim uładam zasiarodzicca na nacyjanalnaj i hramadskaj biaśpiecy. Pa jaho mierkavańni, kraina nie zdolnaja prymać vialikuju kolkaść mihrantaŭ, nie źmianšajučy pry hetym dastupnaść dziaržaŭnych resursaŭ dla amierykancaŭ.

Raniej samaja nizkaja stol pryjomu ŭciekačoŭ była ŭstalavanyja padčas pieršaha terminu Trampa ŭ 2020 hodzie — 15 000 čałaviek na 2021 finansavy hod (finansavy hod nie supadaje z kalandarnym: dla fiederalnaha ŭrada jon ustalavany z 1 kastryčnika pa 30 vieraśnia, a ŭ 46 z 50 štataŭ jon pačynajecca 1 lipienia i zakančvajecca 30 červienia). Jak paviedamlajecca na sajcie Fiederalnaha rehistra, aficyjnaha časopisa ŭrada ZŠA, bolšaja častka z 7 500 kvot budzie «ŭ asnoŭnym» vydzielena afrykanieram — biełym paŭdniovaafrykancam, a taksama «inšym achviaram niezakonnaj abo niespraviadlivaj dyskryminacyi ŭ ich krainach».

U lutym prezident ZŠA abviaściŭ pra prypynieńnie krytyčna važnaj dapamohi Paŭdniovaj Afrycy i prapanavaŭ členam supolnaści afrykanieraŭ — u asnoŭnym biełym naščadkam rańnich hałandskich i francuzskich pasialencaŭ — pierasialicca ŭ ZŠA ŭ jakaści ŭciekačoŭ.

ZŠA taksama vysłali z krainy pasła Paŭdniovaj Afryki ŭ ZŠA Ebrahima Rasuła, pakolki toj abvinavaciŭ Trampa ŭ tym, što toj sprabuje zabiaśpiečyć papularnaść, ŭskosna padtrymlivajučy prychilnikaŭ rasisckaj ideałohii i pradstaŭlajučy biełaje nasielnictva ŭ jakaści achviary.

U traŭni hetaha hoda, padčas sustrečy ŭ Avalnym kabiniecie, Tramp abvinavaciŭ prezidenta Paŭdniovaj Afryki Syryła Ramafosu ŭ tym, što ŭ jaho krainie zabivajuć i pryhniatajuć biełych fiermieraŭ.

Bieły dom taksama pakazaŭ videa, na jakim, jak śćviardžałasia, byli zafiksavany mahiły zabitych biełych fiermieraŭ. Adnak paźniej vyśvietliłasia, što heta byli kadry z akcyi pratestu 2020 hoda, dzie kryžy simvalizavali fiermiery, jakija zahinuli na praciahu mnohich hadoŭ. A niekalki dzion da hetaj napružanaj sustrečy ZŠA nadali prytułak 60 afrykanieram.

Urad Paŭdniovaj Afryki rašuča adrynuŭ śćviardžeńni ab tym, što afrykaniery abo inšyja biełyja paŭdniovaafrykancy padviarhajucca pieraśledu.

Palityka ZŠA, jakaja praduhledžvaje pryjom biełych paŭdniovaafrykancaŭ, užo vyklikała abvinavačvańni ŭ dyskryminacyi z boku pravaabarončych arhanizacyj.

Niekatoryja ź ich śćviardžajuć, što ciapier ZŠA faktyčna začynienyja dla inšych pieraśledujemych hrup abo ludziej, jakija padviarhajucca niebiaśpiecy ŭ svaich krainach — a heta ŭ tym liku byłyja sajuźniki ZŠA ŭ Afhanistanie i na Blizkim Uschodzie.

«Heta rašeńnie nie prosta źnižaje stoł pryjomu ŭciekačoŭ, jano źnižaje naš maralny aŭtarytet», — zajaviła ŭ hety čaćvier prezident i hienieralny dyrektar arhanizacyi Global Refuge Kryš O'Mara Vihnaradža.

«U momant, kali adbyvajucca šmatlikija kryzisy — ad Afhanistana da Vieniesueły, Sudanu i inšych krain, dać bolšuju častku kvot tolki adnoj hrupie — heta značyć padarvać sutnaść prahramy i davier da jaje», — dadała jana.

Što kaža statystyka złačynstvaŭ u PAR

Arhanizacyja Refugees International taksama rezka asudziła krok administracyi Trampa, zajaviŭšy, što jon «pieratvaraje abaronu ŭciekačoŭ i amierykanskija kaštoŭnaści ŭ vyśmiejvańnie».

«Skažam ščyra: ź jakimi b ciažkaściami ni sutykalisia niekatoryja afrykaniery, hetaja hrupa nie maje pierakanaŭčych padstaŭ dla atrymańnia statusu ŭciekača — jany nie chavajucca ad sistematyčnaha pieraśledu», — havorycca ŭ zajavie arhanizacyi.

Urad Paŭdniovaj Afryki pakul nie prakamientavaŭ situacyju.

Padčas majskaj sustrečy ŭ Avalnym kabiniecie Ramafosa vykazaŭ nadzieju, što amierykanskija čynoŭniki «vysłuchajuć paŭdniovaafrykancaŭ pa hetym pytańni», i paźniej dadaŭ, što, na jaho dumku, u Trampa «jość sumnievy i niedavier adnosna ŭsiaho hetaha».

U hetym hodzie Ramafosa padpisaŭ zakon, jaki dazvalaje ŭradu ŭ niekatorych vypadkach adbirać pryvatnuju ziamlu biez kampiensacyi. Vakoł hetaha zakonaprajekta išli aktyŭnyja sprečki.

Paŭdniovaja Afryka nie ŭličvaje dadzienyja pra rasavuju prynaležnaść achviar u svajoj statystycy kryminalnych złačynstvaŭ.

Adnak apublikavanyja ŭ hetym hodzie danyja pakazali, što z kastryčnika pa śniežań 2024 hoda ŭ krainie było zabita 7 000 čałaviek. Ź ich 12 stali achviarami napadaŭ na fiermach, i tolki adzin z zabitych byŭ fiermier.

Jašče piać čałaviek byli žycharami fierm, a čaćviora — rabočymi, vierahodna, čornymi.

• 2
• 1
• 0
• 1
• 0
• 0
• 0
• 0