Kuba navažyłasia na pieramovy z Trampam

Kuba pačała pieramovy z administracyjaj prezidenta ZŠA Donalda Trampa na fonie najvialikšaj enierhietyčnaj kryzisnaj situacyi ŭ historyi krainy, piša Reuters.

Rabočyja pryspuskajuć kubinski ściah kala pasolstva ZŠA ŭ Havanie ŭ pamiać pra kubincaŭ, jakija zahinuli padčas apieracyi ZŠA ŭ Vieniesuele. 5 studzienia 2026 hoda. Fota: AP Photo / Ramon Espinosa

Prezident Kuby Mihiel Dyjas-Kanel u zvarocie da hramadzian paviedamiŭ, što ŭžo try miesiacy ŭ krainu nie pastupaje paliva, a enierhasistema stanovicca ŭsio bolš niestabilnaj. Kab supraćstajać kryzisu i pavialičyć enierhietyčnuju niezaležnaść, u 2026 hodzie Kuba pavialičyła zdabyču ŭłasnych nafty i hazu, a da kanca sakavika płanuje pavialičyć hienieracyju soniečnaj enierhii na 10%.

Taksama prezident Kuby zajaviŭ, što kubinskija ŭłady navažylisia na pieramovy z ZŠA. Ciapier jon sam razam z byłym kiraŭnikom krainy, 94‑hadovym Raulem Kastra kiruje pieramoŭnaj kamandaj ad Kuby.

Dyjas Kanel padkreśliŭ, što kraina hatovaja supracoŭničać z amierykancami na asnovie roŭnaści, pavahi da palityčnych sistem abiedźviuch dziaržaŭ i suvierenitetu.

Ciapier u stalicy Kuby Havanie elektryčnaść adsutničaje bolš za 12 hadzin na sutki, a enierhasistema znachodzicca ŭ stanie «nadzvyčajnaj niestabilnaści» paśla taho, jak tradycyjnyja pastaŭki nafty ź Vieniesueły spynilisia ŭ studzieni z-za paśpiachovaj apieracyi ZŠA pa zachopie tahačasnaha lidara krainy Nikałasa Madura.

Akramia taho, kubinskaja ŭłada abviaściła, što vyzvalić 51 palitźniavolenaha jak «žest dabranadziejnaści» pierad ZŠA praz pasiarednictva Vatykana.

U kancy studzienia Donald Tramp uvioŭ nadzvyčajny stan adnosna Kuby i dadatkovyja myty dla krain, jakija pastaŭlajuć joj naftu, abvinavačvajučy krainu ŭ supracoŭnictvie z «varožymi dziaržavami i terarystyčnymi hrupoŭkami» i ŭ parušeńni pravoŭ čałavieka. U adkaz Kuba abviaściła «mižnarodnaje nadzvyčajnaje stanovišča».

Tramp taksama namiakaŭ na mahčymaść «siabroŭskaha zachopu» krainy, padkreślivajučy, što ZŠA mohuć zrabić «što-niebudź karysnaje» dla nasielnictva.

Kuba, u svaju čarhu, asudziła apieracyju ZŠA ŭ Vieniesuele, adznačajučy, što heta pahražaje stabilnaści rehijona.

Kamientary da artykuła