Raniej prezident ZŠA zajaŭlaŭ, što Kuba «blizkaja da krachu i na miažy taho, kab abvalicca» paśla spynieńnia pastavak nafty ź Vieniesueły.
Prezident ZŠA Donald Tramp vydaŭ ukaz, jakim zrabiŭ mahčymym uviadzieńnie dadatkovych pošlin na tavary z krain, jakija pastaŭlajuć naftu na Kubu. U pačatku studzienia ZŠA zachapili vieniesuelskaha lidara i sajuźnika Havany Nikałasa Madura, i Tramp namiakaŭ, što Kuba moža stać jaho nastupnaj metaj, piša Bi-bi-si.
«Urad Kuby praciahvaje ŭjaŭlać pahrozu nacyjanalnaj biaśpiecy Złučanych Štataŭ. My nie dazvolim zamiežnym dziaržavam padtrymlivać hety režym, dajučy jamu žyćciova važnyja enierharesursy. Adhetul lubaja kraina, jakaja pastaŭlaje naftu ŭ Havanu, sutykniecca z ekanamičnymi nastupstvami ŭ vyhladzie taryfaŭ na svaje tavary pry ŭvozie ŭ ZŠA», — havorycca ŭ zajavie Biełaha doma.
Prapanavanyja novyja pošliny vykładzieny ŭ prezidenckim ukazie, ale ŭ im nie ŭdakładniajecca ni ŭzrovień mahčymych taryfaŭ, ni pieralik krain, jakija mohuć trapić pad abmiežavańni.
Donald Tramp nieadnarazova pahražaŭ pryniać miery suprać Kuby i jaje kamunistyčnaha kiraŭnictva. Raniej amierykanski prezident zaklikaŭ Kubu «pajści na ździełku, pakul nie pozna», ale nie ŭdakładniaŭ ni jaje ŭmoŭ, ni mahčymych nastupstvaŭ dla dziaržavy.
U adkaz prezident Kuby Mihiel Dyjas-Kaniel zajaviŭ, što Vašynhton nie maje maralnaha prava naviazvać jaho krainie jakija-niebudź damoŭlenaści.
Novaja miera śviedčyć ab uzmacnieńni rytoryki Trampa ŭ adnosinach da Kuby, i ŭkaz u značnaj stupieni nakiravany suprać Mieksiki, jakaja ŭ apošnija hady pastaŭlała na Kubu dziasiatki tysiač barelaŭ nafty ŭ sutki.
Raniej Tramp zajaŭlaŭ, što, na jaho dumku, Kuba «blizkaja da kałapsu i na miažy taho, kab abrynucca» paśla spynieńnia naftavych pastavak ź Vieniesueły.
Vieniesueła była asnoŭnym pastaŭščykom nafty na Kubu, nakiroŭvajučy, pavodle acenak śpiecyjalistaŭ, kala 35000 barelaŭ (kala 4,8 tys. ton) nafty ŭ dzień, ale ekspart spyniŭsia jašče ŭ śniežni z-za marskoj błakady Vieniesueły z boku ZŠA. Apošni tankier z naftaj byŭ adpraŭleny na Kubu ŭ siaredzinie śniežnia, paviedamlaje Reuters sa spasyłkaj na ŭnutranyja dakumienty PDVSA, dziaržaŭnaj naftahazavaj kampanii Vieniesueły.
Niedachop paliva ŭžo niekalki hadoŭ mocna bje pa ekanomicy Kuby. U apošnija hady vostraŭ žyvie va ŭmovach pastajannych adklučeńniaŭ elektryčnaści i internetu, a taksama deficytu bazavych praduktaŭ. Pa padlikach kubinskaha demohrafa, nasielnictva krainy ŭ apošnija hady źniziłasia na 18% z-za emihracyi, i źjazdžajuć u pieršuju čarhu maładyja ludzi.
Akramia taho, Tramp zajaviŭ, što «palityka, praktyka i dziejańni ŭrada Kuby ŭjaŭlajuć saboj niezvyčajnuju i nadzvyčajnuju pahrozu» i abvinavaciŭ Havanu ŭ raźmiaščeńni «niebiaśpiečnych praciŭnikaŭ Złučanych Štataŭ».
Va ŭkazie śćviardžajecca, što na Kubie «raźmieščany najbujniejšy zamiežny abjekt radyjoelektronnaj raźviedki Rasii, jaki sprabuje vykraści kanfidencyjnuju infarmacyju ab nacyjanalnaj biaśpiecy Złučanych Štataŭ», a taksama zhadvajucca suviazi vostrava z tym, što va ŭkazie nazvany «varožymi ŭ adnosinach da ZŠA złamysnymi subjektami», u pryvatnaści z Kitajem, Iranam, CHAMAS i «Chiezbałoj».
Novy ŭkaz Trampa kubinskija ŭłady pakul nie prakamientavali.
Na pytańnie, ci stavić pierad saboj ukaz metu «pierakryć kisłarod» Kubie, Tramp znoŭ adkazaŭ, što Kuba ŭjaŭlaje saboj dziaržavu, jakaja nie adbyłasia.
«Nie viedaju, słova «zadušyć» žudasna žorstkaje. Kuba — heta dziaržava, jakaja cierpić krach. Nie, ja nie sprabuju [zrabić heta]. Ale padobna, što jana prosta nie zmoža vyžyć», — skazaŭ Tramp.
Kamientary