Piedahoha-arhanizatara z Homiela, jakaja raniej uznačalvała vajenna-patryjatyčny kłub, asudzili pa troch palityčnych artykułach

Hanna Prymačova vykładała ŭ homielskaj škole i vučyła dziaciej praviłam darožnaha ruchu. Ale niadaŭna joj vynieśli prysud pa šerahu pratesnych artykułaŭ.

Hanna Prymačova. Fota ź jaje staronki Ukantakcie

Hańnie Prymačovaj 47 hadoŭ, jana rodam z Rečycy. U 1999 hodzie skončyła miascovy piedahahičny kaledž, a ŭ 2003‑m atrymała dypłom pa śpiecyjalnaści «biełaruskaja litaratura» na fiłałahičnym fakultecie Homielskaha dziaržaŭnaha ŭniviersiteta imia Francyska Skaryny. U žančyny jość muž i dzicia, apošnim časam jana žyli ŭ haradskim pasiołku Cierachoŭka Dobrušskaha rajona.

Žančyna šmat hadoŭ pryśviaciła pracy ź dziećmi. Raniej jana była namieśnicaj dyrektara pa vychavaŭčaj rabocie ŭ rečyckim vajenna-patryjatyčnym kłubie «Zołak» («Rasśviet»). Na kaniec 2024 hoda Hanna pracavała piedahoham-arhanizataram u siaredniaj škole №66 Homiela. Viadoma, što ŭ druhim paŭhodździ jana pa subotach viała tam hurtok «Junyja inśpiektary darožnaha ruchu» dla vučniaŭ 5—9 kłasaŭ.

Adnak piedahahičnaja karjera pierapyniłasia praz palityčny pieraśled.

Homielski abłasny sud vynies Hańnie prysud adrazu pa niekalkich artykułach Kryminalnaha kodeksa: za ŭdzieł u ekstremisckim farmiravańni (č. 3 art. 361-1), abrazu Łukašenki (č. 1 i 2 art. 368) i abrazu pradstaŭnika ŭłady (art. 369-1).

Joj prysudzili chatniuju chimiju.

Kamientary da artykuła