29‑hadovuju madel i psichołaha z Homiela asudzili za palityku. Mierkavana, za Hajuna
Alina Śmiarčynskaja, hieohraf pa adukacyi, raźvivałasia ŭ prafiesii psichołaha-seksałoha i čas ad času zdymałasia ŭ rekłamie. Ale niadaŭna jaje asudzili pa palityčnym artykule.
Alinie Śmiarčynskaj 29 hadoŭ. Jana rodam z Homiela. Na vučobu pajechała ŭ Minsk i pastupiła na hieafak BDU, dzie vyvučała hieaekałohiju.
Adnak paźniej dziaŭčyna kardynalna źmianiła śfieru i pajšła ŭ psichałohiju. U 2024 hodzie jana prajšła pierapadrychtoŭku ŭ BDPU imia Maksima Tanka pa śpiecyjalnaści «Psichałohija siamiejnych adnosin». Akramia taho, Alina pastajanna pavyšała kvalifikacyju: z 2022 pa 2025 hod prajšła dziasiatki dadatkovych kursaŭ. Siarod ich — miedycynskaja psichałohija i seksałohija, asnovy hieštalt-terapii i KPT, praca ź mietafaryčnymi kartami, rasstanoŭkami, hiendarnaj dysfaryjaj i žanočaj hipaseksualnaściu.
Apošnija hady dziaŭčyna žyła i pracavała ŭ Minsku jak psichołah, ź leta 2024‑ha aficyjna zarehistravałasia jak indyvidualny pradprymalnik. Jana dapamahaje klijentam z samaacenkaj, vyrašeńniem siamiejnych kryzisaŭ i prablem u adnosinach.
Taksama dziaŭčyna časam zdymałasia ŭ rekłamie — naprykład, dla brendaŭ «Słaŭnaja vada» i «Daminas Pica».
U lutym 2026 hoda ŭ Minskim haradskim sudzie Alinie vynieśli prysud pavodle častak 1 i 2 artykuła 361‑4 Kryminalnaha kodeksa (sadziejničańnie ekstremisckaj dziejnaści).
Alinie pryznačyli chatniuju chimiju.
Dakładnyja abstaviny kryminalnaj spravy i danyja pra toje, za što kankretna jaje zatrymali, pakul nieviadomyja. Ale zvyčajna ciapier pa hetym artykule pieraśledujuć pa spravie Hajuna.
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
Sprava Hajuna pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka palahała ŭ tym, što spasyłka była biesterminovaj. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Samu ž dziaŭčynu zatrymali praz toje, što jana była vymušanaja źviarnucca ŭ dziaržaŭnyja struktury, da miedykaŭ. U jaje chłopca, jaki chavaŭsia razam ź joj, pačalisia mocnyja prablemy sa zdaroŭjem na fonie aryštu jaho baćki.
Zasnavalnik Hajuna Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abvieściŭ pra zakryćcio prajekta.
«Naša Niva» — bastyjon biełaruščyny
PADTRYMAĆ
Kamientary
Peŭny barbos vuń usio vieraščaŭ "ia ničieho nie znaju", a praz tydzień - chopa: užo partyju ź niadkul źlapiŭ i kurataram daŭ spravazdaču.
Samarefleksija, kłopat pra reputacyju siarod ruskamirnych naohuł nie ŭ pašanie. Zvyklisia, što narodziec i tak zžare.