Rasijanku-ipešnicu, jakaja pierajechała ŭ Słonim, u Biełarusi pryznali darmajedkaj
U svaim tyktoku rasijanka Hanna Trošyna raspaviadaje, jak dobra dazvalaje joj žyć anłajn-biznes u Biełarusi. Ale niečakana jana sutyknułasia ź siurpryzami miascovych zakonaŭ.
Hanna Trošyna. Skrynšot videa ŭ tyktoku
Sama błohierka z Sachalina, u Biełaruś jana ź siamjoj pierajechała ŭ 2024 hodzie — spačatku ŭ Hrodna, a potym u Słonim, dzie i asieła. Mienavita ŭ hetym horadzie žančyna nabyła dom.
Hanna Trošyna zajmajecca sietkavym markietynham i pradaje roznyja BADy kampanii Siberian Wellness.
Niadaŭna rasijanka pajechała ŭ słužbu zaniataści Słonima, kab pasprabavać pierakanać u tym, što nasamreč nie źjaŭlajecca darmajedkaj u Biełarusi. Z saboj jana mieła dakumienty ab tym, što zarehistravana jak IP u Rasii.
— Ja nie razumieju, u čym roźnica. Tyja, chto pracujuć u Rasii pa pracoŭnaj damovie, nie ličacca darmajedami. A ipešniki ličacca.
Na miescy Hanna sprabuje rastłumačyć supracoŭnicy słužby zaniataści, što płacić padatki i robić strachavyja ŭnioski.
— U mianie adzin varyjant rabić svoj uniosak u ekanomiku Biełarusi — adkryvać tut samazaniataść. Usio. Dla taho, kab nie płacić trajnuju kamunałku.
Raniej Hanna ździŭlałasia tamu, što, kali jaje dačka pajšła ŭ biełaruski sadočak, da ich damoŭ pryjšła vychavalnica z pravierkaj — hladzieła, u jakich umovach žyvie dzicia. I paviedamiła, što siamja abaviazana pastavić pažarnyja apaviaščalniki.
Na radzimie z takim rasijanka nikoli nie sutykałasia. Ale ž pačuła ad vychavalnicy intryhujučaje: «Pažyviacie daŭžej — šmat cikavaha daviedajeciesia».
Taksama Hanna ździŭlałasia koštam na stamatałahičnyja pasłuhi — choć, jak padkreślivaje, sama z rehijona, dzie ŭsio davoli doraha. Pra Biełaruś jana šmat čuła, što tut tannaja stamatałohija i šmat chto pryjazdžaje zrabić zuby. Za vydaleńnie dvuch małočnych zuboŭ dačce błohierka zapłaciła 266 rubloŭ — heta dla jaje stała nie vielmi pryjemnym siurpryzam.
Ale ahułam rasijskaja tyktokierka Biełaruśsiu zadavolena i vielmi chvalić krainu.