«Jak tolki čujuć pra Rasiju — dyk usio… U čym prablema?» U Minsku nie chočuć zdavać kvateru čałavieku z rasijskim pašpartam

«Biełaruś. Minsk. Ja ŭžo ŭ rospačy. My — para, małady čałaviek z rasijskim pašpartam, šukajem kvateru dla arendy. Biudžet — 300—350 dalaraŭ u miesiac. Z damovaj najmu (nikoha rehistravać u žylli nie treba, patrebna tolki damova — ja telefanavała ŭ AHiM i ŭdakładniała). Ja ŭžo atrymała 20 adnaznačnych admoŭ ad ludziej, jakija zdajuć kvatery: jak tolki čujuć pra Rasiju — dyk usio…

Ale ja nie razumieju, u čym prablema… Ja prosta chaču žyć spakojna, płacić vam hrošy za arendu i pracavać.

Vieru ŭ siłu Threads», — napisała dziaŭčyna.

Pavialičyć

U kamientarach jana rastłumačyła, što sama ŭžo 10 hadoŭ žyvie ŭ Homieli i paśpieła pryviazacca da Biełarusi. Jaje małady čałaviek niadaŭna atrymaŭ pracoŭny kantrakt u Minsku, i para płanuje žyć mienavita tam. Ale ž pošuk nieruchomaści pieratvaryŭsia ŭ sapraŭdny kvest.

Da dopisu biełarusy pastavilisia skieptyčna. Niekatoryja napisali, što ź ciapierašnimi cenami lubomu čałavieku budzie składana znajści kvateru ŭ biełaruskaj stalicy za 300-350. Rasijancy raili padniać biudžet chacia b na 100 dalaraŭ, a lepiej — bolš.

Adna z žančyn, jakaja zdaje kvateru, u kamientarach adznačyła, što asabista jaje zasmuciła b u ich historyi adsutnaść štampa ŭ pašparcie. Bo jana ŭžo sutyknułasia ź situacyjaj, kali para pasvaryłasia praź niekalki miesiacaŭ paśla padpisańnia damovy arendy, i chłopiec źjechaŭ, a dachodu adnoj dziaŭčyny nie chapała na apłatu kvatery. U vyniku dla haspadyni heta skončyłasia niekalkimi miesiacami matańnia niervaŭ. Kaža, ciapier pryncypova zdaje tolki ludziam, jakija aficyjna ŭ šlubie.

Šmat chto napisaŭ, što całkam možna zrazumieć biełarusaŭ, jakija nie chočuć zdavać ułasnuju nieruchomaść zamiežnikam. Bo byli ŭžo vypadki, kali niadobrasumlennyja arandatary prosta źjazdžali, palenavaŭšysia aficyjna skasavać damovu. U takich situacyjach uładalniku kvatery časam prychodzicca źviartacca ŭ sud. Bo pakul damova nie skasavana, čałavieku nieabchodna płacić padatak za zdaču kvatery, jakaja faktyčna prastojvaje — pierazdać jaje aficyjna novamu čałavieku amal niemahčyma.

Plus nieabchodna pamiatać pra toje, što biełarusy abaviazany paviedamlać MUS pra zamiežnikaŭ, jakim zdajuć kvatery. Arendadaŭcam, jakija heta nie robiać, pahražaje štraf.

Tamu rasijancy raili sa startu prapanoŭvać haspadaram kvatery pieradapłatu za 3‑5 miesiacaŭ, kab supakoić tych.

Ale ž, kaniečnie, byli ŭ kamientaryjach i tyja, chto ščyra pryznavaŭsia, što nie staŭ by zdavać mienavita hramadzianam Rasii, bo nie vielmi choča bačyć ich u Biełarusi ŭ pryncypie.

• 66
• 0
• 16
• 2
• 1
• 1
• 0
• 1