U Minzdaroŭja raskazali, jak i čamu mieduniviersitety pašyrajuć biudžetny nabor
Va ŭstupnuju kampaniju 2026 hoda ŭ miedycynskija VNU amal całkam admienieny nabor płatnikaŭ, ale značna pavialičany nabor na biudžetnyja miescy.
Fota: Minzdaroŭja
Pavodle kamientara Minzdaroŭja, u miedycynskich vuzach rezka pavialičycca kolkaść biudžetnych miescaŭ — nabor pašyrany na 760 miescaŭ. Letaś na płatnaje adździaleńnie nabirali kala 200 čałaviek.
Raniej kvota dla studentaŭ, jakija iduć pa metavym nakiravańni, była fiksavanaj — 80% pa ŭsich śpiecyjalnaściach. Ciapier jana zaležyć ad zapatrabavanaści kankretnaj prafiesii i składie ad 45% da 70%.
Kantrolnyja ličby pryjomu, dakładnaja kolkaść miescaŭ na kožny fakultet źjaviacca na sajtach univiersitetaŭ paźniej: da 1 krasavika 2026 h. abiacajuć ahulnyja ličby pryjomu, da 1 maja 2026 h. — padrabiaznaści pa metavym nabory.
Jak Minzdaroŭja tłumačyć admienu płatnych miesc u vuzach? Pavodle słoŭ pradstaŭnicy Ministerstva achovy zdaroŭja Volhi Kalupanavaj, miedycyna idzie pa šlachu ahrarnaj i piedahahičnaj śfier, dzie płatny nabor minimizujecca na karyść dziaržaŭnaj padrychtoŭki kadraŭ. «Takim čynam, my dali mahčymaść bolšaj kolkaści talenavitych i matyvavanych maładych ludziej atrymać prestyžnuju adukacyju biaspłatna», — kaža čynoŭnica.
Ale heta značyć, usich miedykaŭ-biudžetnikaŭ paśla vučoby budzie čakać abaviazkovaja adpracoŭka. Paśla 2020 hoda i masavaha adjezdu z krainy vysokakvalifikavanych śpiecyjalistaŭ, Biełaruś adčuvaje deficyt miedycynskich kadraŭ.