U VNU na biudžet prymuć 33,1 tys. čałaviek — u topie piedahohi, inžyniery i miedyki

U 2026 hodzie ŭniviersitety Biełarusi hatovyja pryniać 49,1 tys. abituryjentaŭ, ź ich kala 33,1 tys. — na biudžet, piša sb.by.

U topie napramkaŭ — inžyniery (23,3 % ad usich biudžetnych miescaŭ), piedahohi (11,8 %), miedyki (11,2 %) i ahraryi (9,4 %).

Miedycynskaja adukacyja

Sioleta ŭ miedycynskich VNU admianili płatnyja miescy dla dzionnaj formy navučańnia. Zamiest 200 płatnych miescaŭ u minułym hodzie dadali 760 biudžetnych.

Taksama pierahledzieli metavy nabor — ciapier jon składaje ad 40 da 70 % u zaležnaści ad zapatrabavanaści śpiecyjalnaści (ŭ minułym hodzie było 80 %).

Piedahahičnaja adukacyja

U BDPU na dzionnaje biudžetnaje adździaleńnie vydzielili 1 094 miescy (na 54 bolš, čym u 2025 h.). Jašče 282 biudžetnyja miescy adkryli na zavočnaj formie.

Najbolš zapatrabavanyja śpiecyjalnaści: «śpiecyjalnaja i inkluziŭnaja adukacyja» (165 miescaŭ), daškolnaja adukacyja (145), pačatkovaja adukacyja (125), fizika-matematyčnaja adukacyja (120).

Pavodle słoŭ rektara VNU, pa takich śpiecyjalnaściach płatnych miescaŭ abo zusim niama, abo ich vielmi mała — heta zroblena, kab abituryjenty aryjentavalisia na biudžetnuju formu navučańnia i stypiendyju.

Techničnaja i inžyniernaja adukacyja

U BDTU z 35 śpiecyjalnaściej na 12 prymajuć tolki na biudžet. Siarod ich — niadaŭna adkrytaja «prajektavańnie i technałohija bieśpiłotnych avijacyjnych kompleksaŭ».

U VNU rastłumačyli, što kolkaść biudžetnych miescaŭ vyznačajuć z ulikam patreb arhanizacyj, danych Minpracy i apytańniaŭ pracadaŭcaŭ. Heta dazvalaje rychtavać roŭna stolki śpiecyjalistaŭ, kolki patrebna ekanomicy.

Kamientary da artykuła