Krainy Piersidskaha zaliva pačynajuć sumniavacca ŭ harantyjach ZŠA

Krainy Piersidskaha zaliva ŭsio bolš rasčaroŭvajucca ŭ ZŠA praz vajnu ź Iranam i pačynajuć sumniavacca ŭ tym, ci mohuć raźličvać na amierykanskija harantyi biaśpieki, paviedamlaje Bloomberg sa spasyłkami na krynicy, znajomyja ź situacyjaj.

Ahoń i kłuby dymu padymajucca paśla taho, jak bieśpiłotnik nanios udar pa paliŭnym baku niepadalok ad mižnarodnaha aeraporta Dubaja ŭ Abjadnanych Arabskich Emiratach. 16 sakavika 2026 hoda. Fota: AP

Pa źviestkach Bloomberg, mnohija čynoŭniki z krain Piersidskaha zaliva ŭ pryvatnych razmovach staviać pad pytańnie stratehiju administracyi Donalda Trampa i mety ŭdziełu ZŠA ŭ kanflikcie. Jany taksama niepakojacca, što amierykanskija vajskovyja bazy ŭ rehijonie robiać ich krainy patencyjnymi mišeniami. Pry hetym publična jany pra heta nie havorać, kab nie sapsavać adnosiny z Vašynhtonam.

Asablivuju tryvohu vyklikaje mahčymy mir pamiž ZŠA i Iranam, kali nie buduć abmiežavanyja rakietnyja prahramy Tehierana i padtrymka roznych hrupovak u rehijonie. U takim vypadku krainy Piersidskaha zaliva bajacca zastacca sam-nasam z uzmocnienym i niezadavolenym Iranam, jaki moža praciahvać kantralavać Armuzski praliŭ — važny maršrut dla transpartu nafty i hazu.

Na hetym fonie niekatoryja krainy, u tym liku Abjadnanyja Arabskija Emiraty i Saudaŭskaja Aravija, zajmajuć bolš žorstkuju pazicyju adnosna Irana. Jany navat razhladajuć mahčymaść dałučeńnia da vajennych dziejańniaŭ, kali Iran naniasie ŭdary pa ich krytyčnaj infrastruktury. Adna ź ich hałoŭnych met — stvaryć kaalicyju, jakaja zmoža asłabić abo spynić kantrol Irana nad Armuzskim pralivam.

Taksama adznačajecca, što ŭ rehijonie razhladajuć usie mahčymyja varyjanty, kab razbłakavać hety praliŭ, a lubaja damova ab spynieńni ahniu pavinna abmiažoŭvać jadziernyja pahrozy, rakietnyja prahramy i vykarystańnie Iranam bieśpiłotnikaŭ.

Kamientary da artykuła