U Izraili pryniali novy zakon ab śmiarotnym pakarańni praz paviešańnie

Parłamient Izraila pryniaŭ zakon, jaki praduhledžvaje ŭviadzieńnie śmiarotnaha pakarańnia dla asob, asudžanych za terakty sa śmiarotnymi nastupstvami. Za dakumient prahałasavali 62 deputaty, suprać — 48, paviedamlaje The Guardian.

Zdymak ilustracyjny. Fota: vecteezy.com

Zhodna z novym zakonam, śmiarotnaje pakarańnie moža stać asnoŭnaj mieraj dla paleścincaŭ, asudžanych za takija złačynstvy. Pry hetym prysud možna vynosić biez adnahałosnaha rašeńnia sudździaŭ, a vykanańnie pakarańnia pavinna adbycca na praciahu 90 dzion.

Inicyjatyvu aktyŭna prasoŭvali pravyja palityčnyja siły, u tym liku ministr nacyjanalnaj biaśpieki Itamar Ben-Hvir. Premjer-ministr Bińjamin Nietańjachu taksama padtrymaŭ zakon.

Norma ŭ pieršuju čarhu tyčycca paleścincaŭ, jakich sudziać vajskovyja sudy na Zachodnim bierazie raki Iardan. U toj ža čas hramadzianie Izraila ŭ padobnych vypadkach mohuć atrymać alternatyŭnaje pakarańnie — pažyćciovaje źniavoleńnie.

Zakon vyklikaŭ krytyku z boku pravaabarončych arhanizacyj i mižnarodnych struktur, jakija ličać jaho dyskryminacyjnym i papiaredžvajuć pra mahčymyja parušeńni mižnarodnaha prava. Na ich dumku, heta moža pryvieści da rostu napružanaści i novaj eskałacyi kanfliktu.

Prychilniki ž zakona śćviardžajuć, što bolš žorstkaje pakarańnie pavinna strymlivać złačynstvy.

Varta adznačyć, što ŭ sučasnaj historyi Izraila śmiarotnaje pakarańnie vykarystoŭvałasia vielmi redka — apošni raz u 1962 hodzie, kali byŭ pakarany nacyscki złačyniec Adolf Ejchman. Pry hetym pryniaty zakon jašče moža być abskardžany ŭ Viarchoŭnym sudzie krainy.

Kamientary da artykuła