Afrykanskaja kraina Uhanda niečakana zajaviła pra svajo žadańnie ŭstupić u vajnu ź Iranam na baku Izraila. U krainie zajavili, što, maŭlaŭ, chopić i «adnoj bryhady» uhandyjskaj armii, kab zachapić Tehieran. Jak paviedamlaje RBK-Ukraina, pra heta napisaŭ hałoŭnakamandujučy ŭzbrojenych sił Uhandy Muchuzi Kajnieruhaba, syn dziejnaha prezidenta krainy.
«Ja čuŭ, što našy siabry ŭ Izraili šukajuć dyviziju dla zachopu Tehierana. Asabista ja liču, što dyvizija — heta zanadta šmat. Bryhada NSAU chutka spravicca z hetaj zadačaj», — napisaŭ jon.
Kajnieruhaba patłumačyŭ, što Izrail mocna padtrymlivaŭ Uhandu ŭ 1980‑ia i 1990‑ia hady. Tamu Uhanda, maŭlaŭ, ciapier pavinna vystupić na jaho abaronu.
«Izrail byŭ z nami, kali my byli nikim u 1980‑ch i 1990‑ch hadach. Čamu b nam nie abaranić jaho zaraz, kali naš VUP składaje 100 miljardaŭ dalaraŭ? Adzin z najbujniejšych u Afrycy», — dadaŭ jon.
Taksama hałoŭnakamandujučy ŭhandyjskaj armii adznačyŭ, što kraina padtrymlivaje toj pryncyp, što vajna na Blizkim Uschodzie pavinna zaviaršycca. Ale nie pieramohaj Irana.
«My chočam, kab vajna na Blizkim Uschodzie skončyłasia zaraz. Śviet ad hetaha stamiŭsia. Ale lubyja razmovy pra źniščeńnie ci pieramohu nad Izrailem uciahnuć nas u vajnu. Na baku Izraila!», — reziumavaŭ jon.
Muchuzi Kajnieruhaba — hałaŭkam Narodnych sił abarony Uhandy, starejšy syn dziejnaha prezidenta krainy Javiery Musiavieni. Z 1999 hoda słužyŭ na roznych pasadach va ŭhandyjskich uzbrojenych siłach, vajavaŭ u Paŭdniovym Sudanie.
Kajnieruhaba viadomy svaimi skandalnymi dopisami ŭ sacyjalnych sietkach. Adzin ź incydentaŭ ledź nie kaštavaŭ jamu karjery: u 2022 hodzie Kajnieruhaba publična pahražaŭ uvarvacca ŭ Kieniju, praz što byŭ pazbaŭleny pasady kamandzira piachotnaha padraździaleńnia.
Adnak, niahledziačy na ŭsie skandały, u 2024 hodzie Muchuzi Kajnieruhabu pryznačyli hałoŭnakamandujučym NSAU. Na hetaj pasadzie jon padtrymaŭ vyłučeńnie svajho baćki na siomy prezidencki termin. A ŭ 2025 i 2026 hadach «zaśviaciŭsia» praz adkrytyja pahrozy členam uhandyjskaj apazicyi, jakaja vystupaje suprać ułady Musiavieni.
Ciapier čytajuć
Kola Łukašenka skončyŭ univiersitet — ci trapić jon pad bližejšy pryzyŭ u armiju ci zmoža adkasić?2
Kamientary
Nam vašaja dapamoha vielmi patrebnaja .
U vas strałki dobryja , kulamiotčyki , tankisty .