Izrailskija pasialency napali na paleścinskija vioski na Zachodnim bierazie. Heta adbyłosia paśla hibieli jaŭrejskaha padletka

Usplosk hvałtu pačaŭsia paśla taho, jak u subotu zahinuŭ 18‑hadovy pasialeniec Ijehuda Šerman. Jak paviedamlajecca, padletka, jaki jechaŭ na kvadracykle, źbiŭ aŭtamabil, jakim kiravaŭ paleściniec. Palicyja rasśleduje, ci byŭ napad naŭmysnym abo vypadkovym.

U adkaz u čatach u WhatsApp, jakija vykarystoŭvajucca pasialencami, pačalisia zakliki da «kampanii pomsty» za śmierć Šermana. Pa dadzienych pradstaŭnika Ministerstva abarony, jakoha cytujuć izrailskija ŚMI, za noč było zafiksavana bolš za 20 napadaŭ z boku pasialencaŭ.

Vypadki hvałtu z boku pasialencaŭ pačaścilisia paśla taho, jak ZŠA i Izrail atakavali Iran: pa dadzienych AAN, z 1 sakavika pasialencami byli zabityja šeść paleścincaŭ.

U zajavie Armii abarony Izraila havorycca, što ŭ subotu ŭviečary vojski CACHAŁ i padraździaleńni pamiežnaj palicyi byli nakiravany ŭ niekalki paleścinskich viosak paśla paviedamleńniaŭ pra toje, što izrailskija pasialency «ździajśniajuć padpały budynkaŭ i majomaści, a taksama ładziać biesparadki ŭ hetym rajonie».

Napadam padvierhlisia vioski Džałud, Karyjut, Al-Funkdukmija i Siłat al-Dchach.

Na videazapisy, raspaŭsiudžanaj u internecie, vidać, jak bolš za 90 čałaviek u čornym adzieńni — mnohija ź ich u maskach — biahuć u Džałud.

Na inšych videazapisach, jak miarkujecca, zroblenych u vioscy, vidać pałajučyja aŭtamabili, budynki z raźbitymi voknami i čutny vyćcio siren mašyn chutkaj dapamohi. Na adnoj z fatahrafij vidać nadpis «Adpomścim za Ijehudu», naniesieny na budynak farbaj z bałončyka.

Paleścinskaje tavarystva Čyrvonaha Paŭmiesiaca paviedamiła, što ŭ Džałudzie jak minimum troje paleścincaŭ atrymali ranieńni hałavy i byli dastaŭleny ŭ balnicu paśla sutyknieńnia z napadnikami, niekatoryja ź jakich taksama atrymali ranieńni.

Izrailskija ŚMI paviedamili, što ŭ adnym z paviedamleńniaŭ u čacie ŭ WhatsApp, jaki vykarystoŭvajecca pasialencami, havaryłasia: «Jaŭrei nie buduć maŭčać pra pralituju jaŭrejskuju kroŭ». Inšaje paviedamleńnie abviaščała: «My patrabujem adpłaty i vyhnańnia voraha».

Paleścinskaje Ministerstva zamiežnych spraŭ asudziła napad, zajaviŭšy, što jon uklučaŭ «padpał damoŭ i majomaści, teraryzavańnie i zabojstva mirnych žycharoŭ, a taksama abstreł važnych daroh, skryžavańniaŭ i hałoŭnych vulic padčas Id al-Fitra» [śviata spynieńnia postu, jakoje adznačajecca ŭ kancy Ramadana — red.].

Izrailskaja palicyja ŭ niadzielu paviedamiła, što pamiežniki aryštavali piacioch čałaviek niedaloka ad vioski Dejr al-Chatab. U paviedamleńni taksama havaryłasia, što adzin aficer atrymaŭ ranieńnie paśla taho, jak niekalki izrailcian napali na supracoŭnikaŭ sił biaśpieki kala pasielišča Itamar. U paviedamleńni adznačałasia, što palicyja dziejničaje «z nulavoj pamiarkoŭnaściu da ekstremiscki nastrojenych asob, schilnych da hvałtu».

«Ješ dzin», izrailskaja pravaabarončaja hrupa, jakaja zajmajecca abaronaj pravoŭ paleścincaŭ, nazvała napady, što adbylisia, «nočču pahromaŭ».

«Niahledziačy na najaŭnuju infarmacyju pra płanavanyja napady, siły biaśpieki ŭ čarhovy raz nie padrychtavalisia naležnym čynam, — havorycca ŭ zajavie hrupy, apublikavanaj u niadzielu ŭviečary ŭ X. — Nijakich previentyŭnych mier dla praduchileńnia pahromaŭ pryniata nie było».

Pa dadzienych izrailskich ŚMI, u niadzielu dniom na pachavańni Ijehudy Šermana prysutničała bolš za 500 čałaviek, uklučajučy ultrapravaha ministra finansaŭ Izraila Biecalela Smotryča, jaki znachodzicca pad sankcyjami Vialikabrytanii i inšych krain za padbuchtorvańnie da hvałtu suprać paleścincaŭ.

U niadzielu ŭviečary jaŭrejskija pasialency zabłakavali darohi na Zachodnim bierazie ŭ znak pratestu.

Źjavilisia niepaćvierdžanyja paviedamleńni pra toje, što hrupy pasialencaŭ znoŭ pačali źbiracca kala niekatorych paleścinskich viosak; miascovaje infarmacyjnaje ahienctva WAFA paviedamiła, što jany padpalili aŭtamyjku na paŭnočny zachad ad Nabłusa.

Raniej u hetym miesiacy ES i Vialikabrytanija zapatrabavali ad Izraila pakłaści kaniec usplosku hvałtu suprać paleścincaŭ z boku pasialencaŭ, jaki nazirajecca z pačatku vajny ź Iranam 28 lutaha.

Pa dadzienych AAN, z pačatku hoda siem paleścincaŭ byli zabityja izrailskimi pasialencami i 18 — izrailskimi siłami, pryčym 15 z hetych zabojstvaŭ adbylisia paśla pačatku vajny ź Iranam.

Lider izrailskaj levacentrysckaj partyi «Avoda» Jair Hołan asudziŭ apošnija napady, abvinavaciŭšy izrailski ŭrad u tym, što jon ich dapuściŭ. Jon napisaŭ u X: «U toj čas jak my vajujem u Iranie i na paŭnočnaj miažy, padviarhajučysia rakietnym abstrełam i majučy mnostva ciažkaranienych, hety ŭrad zaachvočvaje tatalnuju anarchiju».

«Jaŭrejski teraryzm raspaŭsiudžvajecca, vykarystoŭvajučy vajnu ŭ svaich metach, pry padtrymcy ministraŭ-ekstremistaŭ i niebiaśpiečnym zaachvočvańni z boku premjer-ministra i ministra abarony». Heta pravał u zabieśpiačeńni adkaznaści za biaśpieku Izraila», — piša dalej Hołan.

Paśla inšaha napadu na minułym tydni načalnik Hienieralnaha štaba CACHAŁ hienierał-lejtenant Ejal Zamir zajaviŭ, što hvałt z boku pasialencaŭ na Zachodnim bierazie «maralna i etyčna nieprymalny».

Izrail pabudavaŭ kala 160 pasieliščaŭ, u jakich pražyvaje 700 000 jaŭrejaŭ, z momantu akupacyi padčas blizkaŭschodniaj vajny 1967 hoda Zachodniaha bieraha i Uschodniaha Ijerusalima — ziemlaŭ, jakija paleścincy, razam z Hazaj, chočuć vykarystoŭvać dla stvareńnia budučaj dziaržavy. Pavodle acenak, pobač ź imi pražyvaje kala 3,3 młn paleścincaŭ.

Zhodna ź mižnarodnym pravam, pasieliščy źjaŭlajucca niezakonnymi.

• 0
• 0
• 0
• 0
• 1
• 0
• 0
• 0